UQK Aqtaýdaǵy ákimshilik polıtsııa basshysyna qatysty sotqa deıingi tergeýdi rastady
AQTAÝ. KAZINFORM — Aqtaýda Ákimshilik polıtsııa basqarmasynyń bastyǵy Súıin Qurmantaevqa qatysty sotqa deıingi tergep-tekserý júrgizilip jatyr.
Bul týraly Qazaqstan Ulttyq qaýipsizdik komıteti Kazinform agenttiginiń resmı saýalyna bergen jaýabynda habarlady.
Buǵan deıin áleýmettik jelide Súıin Qurmantaevqa qatysty UQK Sybaılas jemqorlyqqa qarsy is-qımyl qyzmeti tekserý júrgizip jatqany týraly aqparat taraǵan edi. Onda polıtsııa podpolkovnıgi tanysyna 520 myń teńgege júrgizýshi kýáligin alýǵa kómektesýge ýáde bergeni aıtylǵan.
Osy aqparatqa baılanysty Kazinform redaktsııasy UQK-ge Súıin Qurmantaevqa qatysty tekserý nemese sotqa deıingi tergep-tekserý júrgizilip jatqanyn, 520 myń teńge týraly málimettiń ras-ótirigin, sondaı-aq onyń ustalǵany týraly aqparatty naqtylaý úshin saýal joldady.
UQK sotqa deıingi tergep-tekserý júrgizilip jatqanyn rastady.
— Qazaqstan Respýblıkasy Ulttyq qaýipsizdik komıteti suraýyńyzdy qarastyrdy. Sotqa deıingi tergep-tekserý júrgizilip jatqanyn habarlaımyz. Qylmystyq-protsestik kodekstiń 201-babynyń 1-tarmaǵyna sáıkes ózge aqparat jarııa etýge jatpaıdy, — dep jaýap berdi vedomstvo.
Buǵan deıin, UQK bıylǵy shilde-tamyzda 201 sybaılas jemqorlyq quqyq buzýshylyq deregi tirkelgenin habarlady.
