UQK 242 mln teńgege ázirlengen beıne oıynǵa qatysty tekseris bastady
ASTANA. KAZINFORM — QR Ǵylym jáne joǵary bilim mınıstrligi 242 mln teńge jumsalǵan Steppe Rider bilim berý beıne oıynyn ázirleýge qatysty tekseris bastaý máselesin kóterdi.
Búgin Úkimet otyrysynan keıingi baspasóz máslıhatynda atalǵan oıynǵa qatysty suraq qoıyldy. Osy oraıda mınıstrliktiń Steppe Rider oıynyn ázirleý nátıjesine qanshalyqty kóńili tolatyny suraldy.
Ǵylym jáne joǵary bilim mınıstri Saıasat Nurbek mınıstrlik tıisti tekseriske ózi bastamashy bolǵanyn aıtty.
— Bul másele boıynsha tekserý júrgizý týraly QR UQK-niń Sybaılas jemqorlyqqa qarsy is-qımyl qyzmetine jáne Astana qalasy boıynsha Ekonomıkalyq tergep-tekserý departamentine ótinim joldadyq, — dedi mınıstr.
Onyń sózinshe, qazirgi ýaqytta tergeý amaldary júrip jatyr.
— Osydan keıin tıisti sheshim jarııalanady dep oılaımyn. Bul másele tekserýshi organdardyń quzyretine jatady, — dedi Saıasat Nurbek.
QR Ǵylym jáne joǵary bilim mınıstrligi Til saıasaty komıtetiniń málimetinshe, Steppe Rider — ranner men vıktorına elementteri úılesimi arqyly qazaq tilin oıyn elementteri arqyly úırenýge arnalǵan joba. Oıynshy qar barysymen birge saıahat jasap, tapsyrmalardy oryndaıdy, áripter men sózderdi jınaıdy, jańa taqyryptar men deńgeılerdi ashady.
Osyǵan deıin Saıasat Nurbek eldegi ýnıversıtetterde oqytý qunyna qatysty pikir aıtty.
