Úkimettiń jumys sapasyn arttyrý úshin memlekettik apparatty reformalaý qajet – sarapshy

NUR-SULTAN. QazAqparat – QR Prezıdenti janyndaǵy Qazaqstannyń strategııalyq zertteýler ınstıtýty Almaty qalasyndaǵy ókildiginiń basshysy, ekonomıka ǵylymdarynyń Ph.D doktory Ásel Áben QR Úkimetiniń keńeıtilgen otyrysyndaǵy bastamalar týraly pikir bildirdi, dep habarlaıdy QazAqparat tilshisi.

Jıynda Memleket basshysy Qasym-Jomart Toqaev ekonomıkalyq reformalardyń jańa baǵyty qajettigin atap ótken.

«Prezıdent Qasym-Jomart Toqaev reformalaýdyń naqty baǵyttaryn belgiledi, olar – laıyqty eńbekaqy tólenetin jumys oryndaryn qurý, adam kapıtalynyń sapasyn arttyrý, aıqyn jáne pragmatıkalyq salyq-bıýdjet saıasaty, jeke kásipkerlik pen básekelestikti damytý. Ekonomıkanyń sapaly ósimine qol jetkizý úshin Memleket basshysy qajetti sharttardy naqty belgiledi: «Aıqyn maqsattar, túsinikti mindetter jáne olardyń tolyq oryndalýy», - dedi spıker QazAqparat tilshisine bergen suhbatynda.

Onyń aıtýynsha, kóp jaǵdaıda oryn alǵan máseleler tıimsiz basqarýmen, memlekettik apparattyń kemshiligimen jáne strategııalyq baǵdarlamalardyń iske asyrylýyn tómen baqylaýmen baılanysty.

«Jalpy, kemshilikterdiń bolýyna qaramastan, Memleket basshysy Úkimet quramyna senim artyp otyr. Alaıda, Úkimetten jumys sapasyn arttyrý, úlken ıkemdilik, tabandylyq, tıimdilikti arttyrý talap etiledi. Buǵan memlekettik apparatty reformalaý jáne memlekettik basqarý júıesin qaıta qurý arqyly qol jetkizýge bolady», - dedi Ásel Áben.

Aıta keteıik, QR Úkimetiniń keńeıtilgen otyrysynda Qasym-Jomart Toqaev Úkimet múshelerine berilgen mindetterdi oryndaý úshin kóktemge deıin ýaqyt bergen edi.