Úkimettiń jańa basshysy óndiristen bastap, basqarýshylyqtyń barlyq mektepterinen ótken azamat - Q. Sultanov
ASTANA. 24 qyrkúıek. QazAqparat - Úkimettiń jańa basshysy Serik Ahmetov óndiristen bastap, basqarýshylyqtyń barlyq mektepterinen ótken azamat. Sondyqtan da Májilis Elbasy usynysyn biraýyzdan qoldady.
Búgin QR Parlamenti Májilisinde Memleket basshysy N. Nazarbaev Premer-Mınıstr kandıdatýrasyna Serik Ahmetovti usynyp, ony tómengi palata depýtattary biraýyzdan qoldaǵan bolatyn. Osyǵan oraı QazAqparat tilshisine pikir bildirgen depýtat Qýanysh Sultanov osylaı málim etti.
«Búgingi Májilistiń otyrysynda Prezıdenttiń usynysyn qoldap sóz sóıledim jáne burynǵy Úkimet basshysyna alǵys aıtý nıetine qosylatyndyǵymdy da jetkizdim. Sebebi Serik Ahmetovtiń Premer bolýǵa daıyndyǵy mol dep bilemin. Ol ónerkásip pen óndiristiń otyna aptalyp, kúlin qolymen kósegen, ystyq pen sýyqty, aq pen qarany ajyrata alatyn atpal azamat. Bilikti basshy retinde ózin kórsetti. Óńirlerdiń problemasyn bes saýsaqtaı biledi. Eń bastysy, bıliktiń barlyq mektebinen ótken Serik Nyǵmetuly qoǵamnyń qaıshylyqtaryn da aıqyn sezetin azamat», - dedi Qýanysh Sultanov.
Sonymen qatar, jańa Úkimetke de aıtar tilegi bar ekendigin jetkizgen depýtat: «eń bastysy eldiń áleýmettik jaǵdaıyna jańa serpin beredi dep úmittenemiz. Ásirese aýyl turmysy óńirlerdi órkendetý máselesi áli de ózekti», - dep atap ótti.
