Úkimettiń syrtqy qaryz úlesi 40% azaıdy – Natalıa Godýnova

NUR-SULTAN. QazAqparat – Úkimettiń atynan alynǵan qaryzdyń qurylymynda ishki boryshtyń úlesi artyp, syrtqy boryshtyń úlesi azaıǵan. Bul týraly Respýblıkalyq bıýdjettiń atqarylýyn baqylaý jónindegi Esep komıtetiniń tóraǵasy Natalıa Godýnova Parlamenttiń birlesken otyrysynda aıtty, dep habarlaıdy QazAqparat tilshisi.

«Memlekettik boryshtyń jalpy ishki ónimge qatynasy jańa bıýdjettik saıasattyń tujyrymdamasynda kórsetilgen 27 paıyzdyq mejeden sál asty. Esepti kezeńde Úkimet boryshynyń qúrylymy jaqsardy. Іshki qaryzdyń úlesi 60 paıyzǵa deıin ósip, syrtqy qaryzdyń úlesi 40 paıyzǵa deıin azaıdy. Degenmen, byltyr syrttan alǵan qaryz mólsheriniń 4 ese artýy – aıtarlyqtaı syn-qater», - dedi komıtet basshysy.

Onyń aıtýynsha, syrtqy qaryzdy aqylǵa qonymsyz tartyp, qoldaný áreketi úshin jeke jaýapkershilik engizý sharalary da qolǵa alyna bastaǵan.

«Ondaı túzetýlerdiń bir bóligi ázirlenip, Senattyń qaraýyna joldandy. Qalǵan túzetýler boıynsha jumysty Parlamenttiń kúzgi sessııasynda aıaqtaýdy josparlap otyrmyz.

Osylarmen birge memleket boryshynyń qaýipsiz shegin ashyq esepteý jáne syrttan alynǵan boryshtyń tıimdi ıgerilýine taldaý jasaý tetikterin engizý qajet», - dedi Natalıa Godýnova.