Úkimettiń selektorlyq otyrysynda Parlament pen Úkimettiń zań shyǵarý qyzmetin jetildirýdegi ózara is-qımyly máselesi qaraldy
ASTANA. 13 maýsym. QazAqparat - Parlament pen Úkimettiń zań shyǵarý qyzmetin jetildirýdegi ózara is-qımyly jáne depýtattar kótergen máseleler boıynsha memlekettik organdardyń sharalar qabyldaý týraly máseleler búgin Úkimettiń selektorlyq otyrysynda qaraldy.
Parlament depýtattary men Úkimet músheleri qatysqan otyrysta Senat Tóraǵasynyń orynbasary Muhambet Kópeev sóz sóıledi.
Ýaqyt talabyna saı zańnama qalyptastyrý aıasyndaǵy talqylaýdyń mańyzdylyǵyn atap óte kelip, M.Kópeev zańdardyń sapasy men quqyq qoldaný isindegi tıimdilik máselelerine nazar aýdardy.
«Jańa zaman zańdaryn ázirleý jáne qabyldaý, olardyń sapasyn arttyrý qajettigi Prezıdent Nursultan Nazarbaevtyń jyl saıynǵy Joldaýlarynda, Parlamenttiń kezekti sessııalarynyń ashylýlarynda birneshe márte atalyp ótildi», dedi tóraǵa orynbasary.
M.Kópeev atap ótkendeı, memlekettik bıliktiń zań shyǵarý jáne atqarýshy tarmaqtary arasyndaǵy ózara belsendi is-qımylynyń nátıjesinde damý baǵdarlamasyn iske asyrýǵa baǵyttalǵan quqyqtyq baza mezgilinde ázirlenýde. Bıylǵy sessııa barysynda Úkimet qysqa merzimde aýqymdy zań jobalary toptamasyn ázirlep, Parlamentke bergen bolatyn.
«Parlament Senaty memlekettiń odan ári damýy úshin zańdardyń mańyzdylyǵyn eskerip jáne sapaly bolýyn qamtamasyz ete otyryp, olardyń ýaqytynda qabyldanýy úshin kúsh salatyn bolady», dedi tóraǵa orynbasary.
Zań shyǵarý isiniń sapasyn odan ári jaqsartý máselelerine qatysty M.Kópeev zań shyǵarý úderisterine qatysýshylar qyzmetin úılestirý, quqyqtyq saraptama sapasyn arttyrý, zańdardyń tikeleı yqpal etýi men olardyń quqyqtyq qoldanylýyn jaqsartýdy qamtamasyz etý jónindegi birqatar usynystar aıtty.
Tóraǵa orynbasarynyń aıtýynsha, mınıstrlikter men mekemelerdiń zań qyzmetiniń jaýapkershiligin kúsheıtý qajet, ol zań shyǵarý jumystarynyń sapasyn edáýir arttyrýǵa múmkindik beredi.
Sóziniń sońynda M.Kópeev zań shyǵarý úderisterine barlyq qatysýshylardyń ózara syndarly is-qımylynyń mańyzdylyǵyn atap ótti. «Bul ýaqyt talaby jáne memleket pen qoǵam aldynda turǵan mindetterdi iske asyrýǵa jaýap beretin sapaly quqyqtyq baza jasaýdyń kepili bolyp tabylady», dedi M. Kópeev.
