Úkimettiń «Samuryq-Qazynaǵa», al qordyń ulttyq kompanııalarǵa qatysty dıvıdendtik saıasaty úılesimdi bolýy tıis - Q.Kelimbetov

ASTANA. 28 tamyz. QazAqparat - Úkimettiń «Samuryq-Qazynaǵa», al qordyń ulttyq kompanııalarǵa qatysty dıvıdendtik saıasaty úılesimdi bolýy tıis. Bul pikirdi búgin Úkimet otyrysynda QR Premer-Mınıstriniń orynbasary Qaırat Kelimbetov bildirdi.

Onyń paıymynsha, 2022 jyly «Samuryq-Qazyna» qory Temasek (Sıngapýrdyń alyp kompanııasy, álemdegi eń iri kompanııalardyń biri. Samuryq-Qazyna áýel basta  sol kompanııalardyń formasymen qurylǵan) kompanııasy sııaqty naryqtyq oıynshyǵa aınalyp, túsimge sol kezde qol jetkizedi. Biraq, naryqtyq kompanııalardan aıyrmasy onyń negizgi aktsıoneri memleket bolmaq.

«2013-2014 jyldary álemdik ekonomıka turaqsyz jáne bulyńǵyr bolýy yqtımal. Sondyqtan, makroekonomıkalyq jaǵdaı bıýdjetke jáne ulttyq kompanııalardyń qarjylyq turaqtylyǵyna da áser etýi múmkin», - dedi ol.  

Sonymen qatar Ulttyq qor qarjysyn paıdalaný máselesine toqtalǵan Q.Kelimbetovtiń atap ótýinshe, oǵan Memleket basshysy basqaratyn Qordy basqarý keńesiniń sheshimimen ǵana ruqsat etiledi.  «Dıvıdendtik saıasatqa keler bolsaq, Úkimettiń «Samuryq-Qazyna» qoryna qatysty dıvıdendtik saıasaty jáne qordyń ulttyq kompanııalarǵa qatysty dıvıdendtik saıasaty úılesimdi bolýy tıis. Qazir Úkimet «Samuryq-Qazyna» qorynan joǵary mólsherde dıvıdend almaý ustanymyn qoldaıdy. Óıtkeni, ol qarjyny qor men onyń ulttyq kompanııalary iri strategııalyq jobalardy júzege asyrýǵa jumsamaq», - dedi Q.Kelimbetov.