Úkimettiń rezervi 45 mlrd. teńgege ulǵaıtylady
ASTANA. QazAqparat - Búgin Úkimet otyrysynda QR Ekonomıka jáne bıýdjettik josparlaý mınıstri Erbolat Dosaev QR Úkimetin rezervin ulǵaıtýdy usyndy.
«Boljanbaǵan, onyń ishinde ekonomıkadaǵy ózgeristerge baılanysty týyndaǵan jaǵdaılarǵa ýaqtyly den qoıý úshin Úkimettiń rezervin 45 mlrd. teńge somasyna ulǵaıtý usynylady», - dedi vedomstvo basshysy. Aıta keteıik, búgin Mınıstrler kabınetiniń otyrysynda Úkimet 2014 jylǵa naqtylanǵan bıýdjetti maquldady. Nátıjesinde, 2014 jylǵa arnalǵan respýblıkalyq bıýdjettiń túsimderi 6 206,1 mlrd. teńge kóleminde nemese bekitilgen bıýdjetpen (5 773,7 mlrd. teńge) salystyrǵanda 431,7 mlrd. teńgege ósýmen aıqyndaldy. Respýblıkalyq bıýdjettiń kiristeri (transfertter túsimderinsiz) bekitilgen jospardaǵy 4 029,4 mlrd. teńgege qaraǵanda, 331,7 mlrd. teńgege ulǵaıtyla otyryp naqtylandy jáne 4 360,9 mlrd. teńgeni quraıdy. Óz kezeginde Premer-Mınıstr Serik Ahmetov búgin osy qujat búgin tolyq pysyqtalyp, erteń bıýdjettiń naqtylanǵan jobasy Parlamentke engiziletinin atap ótti.
