Úkimettiń keńeıtilgen otyrysy: Ulttyq bank tóraǵasy esep berdi
«Koronavırýs pandemııasynan týyndaǵan buryn-sońdy bolmaǵan daǵdarys jaǵdaıynda Ulttyq bank Úkimetpen jáne Qarjy naryǵyn retteý jáne damytý agenttigimen birlesip makroekonomıkalyq turaqtylyqty qamtamasyz etý jáne Siz (Memleket basshysy) qoıǵan mindetterge qol jetkizý úshin ýaqytyly sharalar qabyldady», - dedi E. Dosaev.
2020 jyly Ulttyq banktiń negizgi kúsh-jigeri kelesi maqsattarǵa qol jetkizýge baǵyttaldy:
1. Aqsha-kredıt saıasaty ınflıatsııanyń ósýin belgilegen 8-8,5% deńgeıiniń sheginde ustap turýǵa baǵyttaldy. 2020 jyldyń qorytyndysy boıynsha ınflıatsııa 7,5% boldy.
2. Ulttyq bank valıýta naryǵynda turaqtylyqty qamtamasyz etti. Teńgedegi aktıvterdi qorǵaý maqsatynda alypsatarlyqqa jol bermeý jáne shetel valıýtasynyń usynysyn qoldaý boıynsha sharalar kesheni qabyldandy.
«Úshinshiden, Ulttyq bank qarjy naryǵyn damytýǵa járdem kórsetti. Úkimetpen birlesip aqsha naryǵyndaǵy artyq ótimdilik bıýdjet tapshylyǵyn qarjylandyrýǵa baǵyttaldy. Bul rette memlekettik baǵaly qaǵazdar shyǵarylymdaryndaǵy naryq qatysýshylarynyń úlesi 3,8%-ten 32,7%-ke deıin ulǵaıdy», - dedi UB basshysy.
Onyń aıtýynsha, Prezıdenttiń ekonomıkalyq belsendilikti qoldaý boıynsha daǵdarysqa qarsy bastamalaryn iske asyrý úshin Ulttyq bank 2,3 trln teńgege daǵdarysqa qarsy sharalardy qarjylandyrdy, bul daǵdarysqa qarsy jalpy qarjynyń 50%-ten astamyn quraıdy.
«2020 jyly joǵary naryqtyq qubylmalylyqqa qaramastan, Ulttyq banktiń basqarýymen aktıvterdiń joǵary kiristiligi qamtamasyz etildi. Ulttyq qordyń kiristiligi 7,6%, zeınetaqy aktıvteriniń kiristiligi - 10,9% boldy, bul ınflıatsııadan 3,4%-ǵe joǵary», - dedi E. Dosaev.
