Úkimettiń Qaýlysymen tótenshe jaǵdaı kezinde tele- jáne radıo arnalar habar taratýdy toqtatatyn bolady

Qazaqstan Respýblıkasy Úkimetiniń qaýlysy №1112

2012 jylǵy 31 tamyz  Astana, Úkimet Úıi

Adamdardyń ómirine, densaýlyǵyna tóngen qaýip-qater jáne tabıǵı jáne tehnogendik sıpattaǵy tótenshe jaǵdaılar kezinde qalyptasqan jaǵdaıdaǵy is-qımyldar tártibi týraly halyqty habardar etý, sondaı-aq qorǵanys, ulttyq qaýipsizdik jáne quqyqtyq tártipti qorǵaý múddelerinde teleradıo habarlaryn taratý jelilerin paıdalaný qaǵıdalaryn bekitý týraly

«Teleradıo habarlaryn taratý týraly» Qazaqstan Respýblıkasynyń 2012 jylǵy 18 qańtardaǵy Zańy 6-babynyń 10) tarmaqshasyna sáıkes Qazaqstan Respýblıkasynyń Úkimeti qaýly etedi:

1. Qosa berilip otyrǵan Adamdardyń ómirine, densaýlyǵyna tóngen qaýip-qater jáne tabıǵı jáne tehnogendik sıpattaǵy tótenshe jaǵdaılar kezinde qalyptasqan jaǵdaıdaǵy is-qımyldar tártibi týraly halyqty habardar etý, sondaı-aq qorǵanys, ulttyq qaýipsizdik jáne quqyqtyq tártipti qorǵaý múddelerinde teleradıo habarlaryn taratý jelilerin paıdalaný qaǵıdalary bekitilsin.

2. Osy qaýly alǵashqy resmı jarııalanǵan kúninen bastap kúntizbelik on kún ótken soń qoldanysqa engiziledi.

Qazaqstan Respýblıkasynyń Premer-Mınıstri K.MÁSІMOV.

Qazaqstan Respýblıkasy Úkimetiniń 2012 jylǵy «31» tamyzdaǵy « 1112 qaýlysymen bekitilgen

Adamdardyń ómirine, densaýlyǵyna tóngen qaýip-qater jáne tabıǵı jáne tehnogendik sıpattaǵy tótenshe jaǵdaılar kezinde qalyptasqan jaǵdaıdaǵy is-qımyldar tártibi týraly halyqty habardar etý, sondaı-aq qorǵanys, ulttyq qaýipsizdik jáne quqyqtyq tártipti qorǵaý múddelerinde teleradıo habarlaryn taratý jelilerin paıdalaný qaǵıdalary

1. Jalpy erejeler

1. Osy Adamdardyń ómirine, densaýlyǵyna tóngen qaýip-qater jáne tabıǵı jáne tehnogendik sıpattaǵy tótenshe jaǵdaılar kezinde qalyptasqan jaǵdaıdaǵy is-qımyldar tártibi týraly halyqty habardar etý, sondaı-aq qorǵanys, ulttyq qaýipsizdik jáne quqyqtyq tártipti qorǵaý múddelerinde teleradıo habarlaryn taratý jelilerin paıdalaný qaǵıdalary (budan ári - Qaǵıdalar) tabıǵı jáne tehnogendik sıpattaǵy tótenshe jaǵdaılar kezinde halyqty habardar etý is-sharalaryn júzege asyrý kezinde, sondaı-aq qorǵanys, ulttyq qaýipsizdik jáne quqyqtyq tártipti qorǵaý múddelerinde teleradıo habarlaryn taratý jelilerin paıdalaný tártibin aıqyndaıdy.

2. Halyqty habardar etý adamdardyń densaýlyǵy men ómirin saqtaýǵa, sharýashylyq obektileri men qorshaǵan ortany qorǵaýǵa, qoǵamdyq tártipti qoldaýǵa qajetti júris-turys qaǵıdalary, is-qımyldar men sharalar tártibi týraly aqparattandyrý maqsatynda júzege asyrylady.

3. Halyqty habardar etý úshin teleradıo habarlaryn taratý jelilerin paıdalaný aǵymdaǵy tele-, radıobaǵdarlamalaryn taratýdy toqtatyp, teleradıo habarlaryn taratýdyń barlyq jelileri men arnalary arqyly beıne, mátindik jáne dybystyq habarlamalardy berý arqyly júzege asyrylady.

4. Halyqty habardar etý úshin teleradıo habarlaryn taratý jelilerin paıdalanýǵa: Qazaqstan Respýblıkasy Tótenshe jaǵdaılar mınıstrligi, Qazaqstan Respýblıkasy Ulttyq qaýipsizdik komıteti, Qazaqstan Respýblıkasy Іshki ister mınıstrligi, Qazaqstan Respýblıkasy Qorǵanys mınıstrligi ókiletti.

5. Qaǵıdalar menshik nysanyna qaramastan, Qazaqstan Respýblıkasynyń aýmaǵynda qyzmetin júzege asyratyn, barlyq tele-, radıokompanııalar men teleradıo habarlaryn taratý operatorlary úshin mindetti bolyp tabylady.

2. Halyqty habardar etý úshin teleradıo habarlaryn taratý jelilerin paıdalaný tártibi

6. Osy Qaǵıdalardyń 4-tarmaǵynda kózdelgen memlekettik organdar qorǵanys, ulttyq qaýipsizdik jáne quqyqtyq tártip múddelerine qaýip tóndiretin tótenshe jaǵdaılardyń týyndaý qaýpi týraly beıne, mátindik jáne dybystyq habarlamalar úlgilerinen turatyn aqparat tasymaldaǵyshtardy jáne tehnıkalyq quraldardy teleradıo habarlaryn taratý operatorlaryna jáne tele-, radıo kompanııalaryna usynady. Aqparat tasymaldaǵyshtardyń mazmuny tótenshe jaǵdaılar, ulttyq, qoǵamdyq jáne áskerı qaýipsizdik salasyndaǵy normatıvtik quqyqtyq aktilerge tıisti ózgerister men tolyqtyrýlar engizilgen jaǵdaıda jańartylady.

7. Teleradıo habarlaryń taratý operatorlary men osy Qaǵıdalardyń 4-tarmaǵynda kózdelgen memlekettik organdardyń ózara árekettesý tártibi teleradıo habarlaryn taratý operatory múddeli memlekettik organdarmen birlesip ázirleıtin jáne bekitetin, tıisti reglamentterde anyqtalady.

8. Múddeli memlekettik organdardyń jedel kezekshilerinen habar alǵannan keıin teleradıo habarlaryn taratý operatorlary jáne tele-, radıokompanııalar jedel túrde tele-, radıobaǵdarlamalardyń taralýyn toqtatýdy júzege asyrady jáne aqparat tasymaldaǵyshpen tıisti aqparatty halyqqa taratýdy qamtamasyz etedi.

9. Keıinge qaldyrý múmkin emes aıryqsha jaǵdaılarda tótenshe jaǵdaılar qaýpi men týyndaýy, sondaı-aq qorǵanys, ulttyq qaýipsizdik jáne quqyqtyq tártipti qorǵaý múddelerine qaýip tóndiretin jaǵdaılar týraly halyqty jedel aqparattandyrý úshin vedomstvolyq tehnıkalyq tele-, radıobaǵdarlamalaryn taratýdy toqtatý quraldarymen jabdyqtalǵan Qazaqstan Respýblıkasy Tótenshe jaǵdaılar mınıstrligi jedel kezekshisiniń jumys ornynan, keıinnen tıisti teleradıo habarlaryn taratý operatory men tele-, radıokompanııalarǵa aýyzsha (taratýdy toqtatqan sátten bastap 10 mınýttan keshiktirmeı) jáne 5 jumys kúnniń ishinde jazbasha málimdeı otyryp, tikeleı toqtatylady.

Aǵymdyq teleradıo habarlaryn taratýdy toqtatýdyń bir rettik uzaqtyǵy bir saǵat ishinde eki-úsh ret qaıtalanýy kezinde 5 mınýttan aspaıdy.

10. Teledıdar jáne radıo baǵdarlamalaryn taratýdy toqtatý kezinde tikeleı efırde dybystyq habarlamalardy berýdi osy Qaǵıdalardyń 4-tarmaǵynda belgilengen memlekettik organdardyń jedel kezekshileri ne teleradıo habarlaryn taratý operatorlary men tele-, radıokompanııalar dıktorlary júzege asyrady.

11. Osy Qaǵıdalardyń 4-tarmaǵynda kózdelgen memlekettik organdar teleradıo habarlaryn taratý operatorlarymen jáne tele-, radıokompanııalarmen birlesip, toqsanyna keminde 1 ret tehnıkalyq quraldardyń teledıdar jáne radıo habarlaryn taratýdy toqtatýǵa ázirligin tekserýdi merzimdi júzege asyrady.