Úkimettiń daǵdarysqa qarsy baǵdarlamasyn iske asyrý sheńberinde agrarlyq sektordy qoldaý máseleleri talqylandy
ASTANA. Sáýirdiń 27-si. Qazaqparat. Búgin Parlament Senatynda depýtattar Qarjy jáne bıýdjet komıtetiniń tóraǵasy Qaırat Işanovtyń basshylyǵymen «QazAgro «Ulttyq basqarýshy holdıngi» Aktsıonerlik qoǵamynyń basqarma tóraǵasy Asyljan Mamytbekovpen kezdesip, onda bıýdjet qarajatyn paıdalanýdyń tıimdiligi men Qazaqstan Respýblıkasy Úkimetiniń daǵdarysqa qarsy baǵdarlamasyn iske asyrý sheńberinde agrarlyq sektordy qoldaý máseleleri talqylandy,
dep habarlaıdy Senattyń baspasóz qyzmeti.
Kezdesý basynda sóz alǵan senator Jaqaı Nurǵalıev qatysýshylar nazaryn agroónerkásip keshenindegi keleli máselelerge aýdaryp, búgingi tańda eńbek ónimdiligin arttyrý, ónimder sapasyn jaqsartý, zamanaýı ınfraqurylym men aqparattyq-logıstıkalyq bazany damytý, ınvestıtsııalyq saıasatty, sýbsıdııalaý tetikterin jáne aýyl sharýashylyǵy ónimderin satyp alýdy jetildirý salalaryndaǵy jedel sheshýdi talap etetin máselelerdi atap ótti.
Agroónerkásip kesheni aldynda turǵan mindetterdi, Kedendik odaq aıasyndaǵy jumystardy jáne Dúnıejúzilik saýda uıymyna múshelikke ótý joldaryn quqyqtyq qamtamasyz etý máselelerine toqtala kelip, J.Nurǵalıev elimizdiń agroónerkásip keshenin odan ári jetildirýge baǵyttalǵan zańnamalyq bazany jetildirýge qatysty usynystardy jarııa etý qajettigin aıtty.
«QazAgro» holdınginiń basshysy A.Mamytbekov depýtattardy kompanııanyń ótken jylǵy jumys qorytyndylary men ústimizdegi jyl ishindegi qyzmetteri týraly habardar etti.
Basshynyń sózinshe, azyq-túlik qaýipsizdigi men agroónerkásip kesheniniń eksporttyq áleýetin damytý mindetterin júzege asyrýǵa 2009 jyly Ulttyq qordan 120 mıllıard teńge bólindi. Qarajat kóktemgi-dala jáne kúzgi egin orý jumystaryn júrgizýdi, ınvestıtsııalyq jobalardy qarjylandyrýǵa jáne astyq naryǵyn turaqtandyrý maqsatynda astyq satyp alýǵa baǵyttaldy.
A.Mamytbekovtyń aıtýynsha, ótken jyly Holdıngtiń enshiles kompanııalary arqyly eldiń agroónerkásip keshenin qoldaýǵa barlyǵy 220 mıllıard teńge baǵyttaldy, ol 2008 jylǵy (166,8 mlrd. teńge) deńgeıden 32,2 paıyzǵa joǵary.
Ústimizdegi jyly respýblıkalyq bıýdjetten agrarlyq salaǵa 80 mıllıard teńge bólindi. Búgingi tańda, holdıng jetekshisiniń málimetinshe, kóktemgi-dala jumystaryn qarjylandyrýǵa 31,66 mıllıard teńgeden astam qarjy bólindi.
Qamsyzdandyrýdyń ótimdiligi joǵary kepildigin usynýǵa múmkindigi joq shaǵyn aýyl sharýashylyǵy taýar óndirýshilerin qoldaýdyń jańa baǵdarlamasyn iske qosý úshin ústimizdegi jyldyń 1 shildesine deıin Holdıng jeke qarajaty esebinen 500 mıllıon teńge bólýdi josparlap otyr.
A.Mamytbekovtyń málimetinshe, jalpy alǵanda, 2009-2011 jyldardyń ishinde Ulttyq qordyń qarajaty esebinen 283 mıllıard teńgeden asa somaǵa is-sharalar qarjylandyrylady.
Kezdesýde sonymen qatar, «QazAgroFınans» AQ jáne «Mal ónimderi korporatsııasy» AQ basqarma tóraǵalary D.Aıtjanov jáne A.Solıýlev sóz sóılep depýtattardyń suraqtaryna jaýaptar qaıtardy. Onyń barysynda jańa tehnologııalardy engizý, qaıta óńdeý salasyn, aýyl eńbekkerlerin shaǵyn nesıeleý, sý tasqynynan zardap shekken aımaqtardaǵy aýyl sharýashylyǵy óndirýshilerin jeńildetilgen nesıeleýdi júzege asyrý máseleleri kóterildi.
Kezdesýge aýyl sharýashylyǵy vıtse-mınıstri M.Orazaev qatysty.
