Úkimettiń daǵdarysqa qarsy baǵdarlamasy óz mindetin tolyǵymen oryndady

Bul týraly agenttik tilshisine suhbat bergen «Ekonomıkalyq damý ınstıtýty» AQ prezıdentiniń mindetin atqarýshy Jámıla Bopıeva aıtty.

2008 jyldyń sońynda qabyldanǵan atalmysh baǵdarlamanyń 2009-2010 jyldarǵa eseptelingenin basa aıtqan ol: «Sol bir aralyqta eldiń ishinde de, syrttan da óte kóp syn boldy. Kópshiligi jospardy júıesiz ári jekelegen sharalary úzik-úzik dese, sheteldik sarapshylar Qazaqstannyń qarjy júıesi álemdik qarjy júıesimen basym túrde ıntegratsııalanǵandyqtan daǵdarystan shyǵýy óte qıyn bolatyndyǵyn boljady», - dedi.

Degenmen qazirgi ýaqytta elimizdiń ekonomıkasy daǵdarysqa deıingi kezeńdegi qarqynyna qaıta oralǵanyn aıtqan J.Bopıevanyń pikirinshe, oǵan ótken jyldyń qorytyndysy boıynsha 7 paıyzdan astam ósim kórsetken jalpy ishki ónim kórsetkishi dálel bola alady.