Úkimettiń charterlik reısterin qysqartyp, onyń qarajatyn sanıtarlyq avıatsııany jandandyrýǵa jumsaǵan oryndy -T. Syzdyqov
ASTANA. Mamyrdyń 19-y. QazAqparat /Qanat Mámetqazyuly/ - Úkimettiń charterlik reısterin qysqartyp, onyń qarajatyn sanıtarlyq avıatsııany jandandyrýǵa jumsaǵan oryndy.
Búgin Parlament Májilisiniń jalpy otyrysynda Úkimet basshysynyń atyna saýal joldaǵan depýtat Tıto Syzdyqov elimizdegi sanıtarlyq avıatsııany jandandyrý týraly máseleni kóterdi, dep habarlaıdy QazAqparat.
Depýtattyń aıtýynsha, 1990 jyldardaǵy qarajat tapshylyǵynan elimizdiń basym óńirlerinde sanıtarlyq avıatsııa toqtatylyp, talan-tarajyǵa túsken. Endigi kúni sol medıtsınalyq avıatsııa qyzmeti aýyr kóliktermen atqarylyp keledi.
«Aýyldyq jerlerdegi hál ústinde jatqan naýqastar 300-400 shaqyrymǵa ÝAZ mashınasymen 4-5 saǵat júrip jetkizedi. Bundaıda naýqastyń ómirin arashalap qalý múmkindikteri de tómendeıdi. Biz ótken jyly qabyldaǵan Halyqtyń densaýlyǵyn saqtaý týraly Kodekstiń 50-babyna sáıkes, sanıtarlyq avıatsııa - shuǵyl medıtsınalyq kómek usyný nysany bolyp bekitilgen. Sonymen birge, Úkimet qaýlysyna sáıkes, sanıtarlyq avtsıatsııa tegin medıtsınalyq kómektiń kepildendirilgen kóleminiń tizbesine de engizildi. Alaıda, shalǵaıda turatyn jurtshylyq osy sanıtarlyq avıatsııa qyzmetiniń jandanýyn áli kútip otyr», dedi depýtat.
Onyń aıtýynsha, aǵymdaǵy jyly elimizde oryn alǵan apattar barysynda da bundaı avıatsııa qyzmetiniń tıimdiligi, tıgizgen septigi mol bolǵan.
«Bizge árbir adamnyń ómiri qymbat. Sondyqtan da, meniń oıymsha, Úkimet músheleriniń charterlik reısterin qysqartyp, odan únemdelgen qarajatty halyqtyń muqtajyna, sanıtarlyq avıatsııany jandandyrýǵa jumsaǵan oryndy. Konstıtýtsııa boıynsha bizdiń el turǵyndarynyń quqyǵy birdeı, biraq shalǵaıdaǵy naýqastardy ajaldan arashalap qalýdaǵy múmkindikter ártúrli bolyp otyr», dedi depýtat.
