Úkimettiń atqarǵan jumysy ár oblys, ár aýdan, ár aýylǵa, kerek deseńiz ár kóshege jetti - N. Erimbetov
ASTANA. QazAqparat - Serik Ahmetov basqarǵan Úkimettiń jumysyn óz basym joǵary baǵalaımyn. Naqty jumystar atqaryldy. Onyń atqarǵan jumystary ár oblys, ár aýdan, ár aýylǵa, tipti kerek deseńiz ár kóshege jetti, dep atap ótti belgili saıasattanýshy Nurlan Erimbetov QazAqparat tilshisine bergen suhbatynda.
Onyń aıtýynsha, belgili bir úkimettiń bastan-aıaq atqarǵan jumysyna bir aýyz sózben baǵa berý óte qıyn.
«Men odan da mynadaı bir mysal keltireıin. Stýdent kezimizde, jas kezimizde barlyq saıası bıýro, Kommýnıstik partııanyń ortalyq komıtetiniń barlyq múshelerin jatqa biletin edik. Barlyq mınıstrlerdi atyn atap, túsin tústep bere alatyn edik. Barlyq Keńestik Respýblıkalardyń basshylaryn, Úkimet basshylaryn uıyqtap jatqanda oıatyp surasa da, jipke tizgendeı qylyp beretinbiz. Bul bizdiń saıası saýatymyzdyń, deńgeıimizdiń kórsetkishi boldy. Biz osymen maqtanatynbyz», - deıdi saıasattanýshy.
Keńes odaǵy kezindegi saıası jaǵdaıdy eske ala otyryp, ol bylaı dedi:
«Birde shamamen 80-shi jyldardyń basynda Máskeýde stýdentter arasynda úlken festıval boldy. Sonda Eýropa men Amerıkadan biraz stýdentter keldi. Bir qyzyǵy, olar mınıstrler túgili ózi turatyn qalanyń meriniń atyn bilmeıtin bolyp shyqty. Sonda biz olarǵa «Senderdiń saıası saýattaryń - nól! Túk bilmeısińder!» dep kúlgenbiz».
«Alaıda kóp jyldan keıin qarap otyrsam, olar baqytty adamdar eken. Sebebi, olardyń ómiri kezekti bir mınıstrge, kezekti merge, kezekti Úkimet basshysyna baılanysty emes. Sondyqtan olarǵa kim kelip jatyr, kim ketip jatyr, báribir. Óıtkeni olardyń ómiri ózgermeıdi. Nege biz úkimettiń ózgerýine baılanysty ózimizdiń ómirimizdi «bólshekteýimiz» kerek? Meniń jumysym, meniń jaǵdaıym, meniń otbasym buryn qalaı bolsa, solaı bolyp qalýy tıis. Bizdiń ómirimiz óz arnasymen turaqty túrde aǵa berýi qajet. Másele osyda! Saıası jáne ekonomıkalyq turaqtylyqta», - dep túıindedi ol.
