Úkimettiń aldynda turǵan mindet – otandyq vaktsınany eshbir kedergisiz óndiriske engizý - Toqaev
NUR-SULTAN. QazAqparat - Qasym-Jomart Toqaev koronavırýs indetiniń taralýyna qarsy is-qımyl sharalary jóninde keńeste otandyq vaktsınany eshbir kedergisiz óndiriske engizýdi tapsyrdy, dep habarlaıdy QazAqparat Aqordaǵa silteme jasap.
Qasym-Jomart Toqaev kez kelgen qıyndyqtar men daǵdarystar jańa múmkindikterge jol ashatynyn taǵy da atap ótti. Aıtarlyqtaı jetistikterimiz de bar. Máselen, eki birdeı otandyq vaktsına keleshegi zor álemdik bıoquraldardyń qataryna engizilip, qazirgi ýaqytta olarǵa klınıkalyq zertteýler júrgizilýde.
– Úkimettiń aldynda turǵan úlken mindet – otandyq vaktsınany eshbir kedergisiz óndiriske engizý. Ýaqytsha tirkeý tártibin jeńildetip, vaktsınanyń tájirıbelik-ónerkásip jáne ónerkásip óndirisine arnalǵan zaýyt qurylysyn aıaqtaý qajet. Men Reseı Prezıdentimen reseılik vaktsına óndirisi zaýytynyń qurylysy boıynsha kelisimge keldim. Úkimet osy qajetti jobaǵa ınvestıtsııa tartý boıynsha kelissózderdi bastap ta ketti. Bıologııalyq qaýipsizdikti qamtamasyz etýdiń barlyq baǵyttary boıynsha jumysty jalǵastyrý mańyzdy. Mundaı sharalardy damyǵan memleketterdiń bári qabyldap jatyr. Parlamenttiń osy sessııadaǵy jumysy aıaqtalǵanǵa deıin depýtattardyń qaraýyna Bıologııalyq qaýipsizdik jónindegi zań jobasyn engizý kerek, – dedi Memleket basshysy.
Sóz sońynda Prezıdent barsha azamattardy tártipti qatań saqtaýǵa, ýaqytsha shekteý sharalaryna túsinistik tanytýǵa shaqyrdy. Eń aldymen, bul barsha qazaqstandyqtardyń densaýlyǵy úshin qajet. Memleket basshysy dárigerlerge, polıtsııa qyzmetkerlerine, áskerı qyzmetshilerge jáne pandemııamen kúreste aldyńǵy shepte júrgen barsha azamattarǵa rızashylyǵyn bildirdi.
