Úkimettiń aqshasyn árbir fermerge jetkizýimiz kerek - Áýezxan Darynov
ASTANA. QazAqparat - Úkimettiń sheshimine sáıkes, «Azyq-túlik korporatsııasy» AQ-sy úshinshi suryptaǵy bıdaıdyń 2 mln tonnasyn 42 myń teńgeden satyp alatyn boldy. Qazaqstan fermerleri odaǵynyń prezıdenti Áýezxan Darynovtyń aıtýynsha, endigi kezekte osy aqshany árbir dıqannyń qolyna tıgizý kerek, dep xabarlaıdy QazAqparat tilshisi.
«Aqshanyń bólingeni ol - sharýanyń jartysy ǵana. Endi, sonyń bárin sharýa qojalyqtaryna jetkizý kerek. Ózderińiz jaqsy bilesizder, búginde neshetúrli jaǵdaılar bar. Ákimge jaqyn otyrǵandar, basqalary buryn alyp qoıýy múmkin. Sondaı jaǵdaı bolmas úshin biz úkimetke usynys jasadyq. Jergilikti jerde ákimshilik qyzmetkerlerimen birge Qazaqstan fermerleri odaǵynyń músheleri bolýy kerek. Qarjy fermerlerdiń bireýine jetip, bireýine jetpeı qalmaýy qajet», - dedi Á.Darynov búgin Astanada ótken baspasóz máslıxatynda.
Uıym basshysynyń aıtýynsha, dıqandardyń astyǵyn joǵary baǵamen satyp alý máselesi eki aıdan beri kóterilip keledi. Fermerler odaǵy mınıstrlikke de, úkimetke de aryzdandy. Sonyń nátıjesinde astyq baǵasynyń kúrt tómendeýine qaramastan, dıqandardyń ónimin burynǵy baǵamen satyp alý týraly sheshim qabyldandy.
Árbir fermerge tıesili astyqtyń 20-30 paıyzy satyp alynady. «Árıne, úkimetke astyqtyń bárin satyp al dep aıta almaımyz. Biraq esepteı kele, eń bolmasa, bizdiń jınaǵan astyǵymyzdyń 20-30 paıyzyn satyp alsa, jumysshylardyń jalaqysyn, qaryzdyń bir bóligin jabýǵa bolady. Sosyn osy ýaqytta qardy ustaý qajet. Óıtkeni qar degen - kelesi jyldyń ylǵaly. Qazir ylǵaldy ustap qalsaq, kelesi jylda astyqty kóbirek alýǵa bolady», - dep atap kórsetti Á.Darynov.
Aıta keteıik, Úkimettiń keshegi otyrysynda QR Premer-Mınıstri Baqytjan Saǵyntaev dıqandardyń astyǵyn joǵary baǵamen satyp alýǵa tapsyrma berdi.
R Aýyl sharýashylyǵy vıtse-mınıstri Qaırat Aıtýǵanovtyń aıtýynsha, qyrkúıek aıynan bastap ishki naryqta astyqtyń baǵasy tómendep ketken. Oǵan birneshe faktor áser etti. Birinshiden, bıyl Reseıde astyq rekordtyq kólemde jınaldy. Sodan Qazaqstanmen shekaralas aımaqtarda arzan astyq kóbeıip, zańsyz jolmen tasymaldana bastady. Ekinshiden, vagondardyń tapshylyǵy ózekti bolyp tur. Vagon jetispegennen keıin xalyqaralyq treıderlerdiń talaptary oryndalmaıdy. Úshinshiden, Azyq-túlik korporatsııasy sylbyr qımyldap jatyr.
«Sońǵy bir apta boıy biz osy máseleni kúnde pysyqtap kelemiz. Barlyǵy qoldap otyr. Qarjynyń kózin anyqtadyq. Baǵany 42 myń dep belgiledik. Endi, astyqty satyp alý sharalaryn abyroımen atqaryp shyǵý qajet. Ony jyldam ári ashyq túrde ótkizý kerek. Osyǵan baılanysty oblys ákimderi arnaıy shtabtardy qursyn. Oǵan ákimdik qyzmetkerlerin ǵana emes «Atameken» palatasy men Qazaqstannyń fermerleri odaǵyn da tartý qajet. Aqsha adresatqa jetýi tıis. Reseıdiń astyǵyna, ıá bolmasa, bir qolǵa ketip qalmasyn. Sondyqtan osy máseleni qatań baqylaýda ustańyzdar!», - dep atap kórsetti Úkimet basshysy.
