Úkimettik emes uıymdarǵa beriletin qarjynyń kólemi úsh esege artty - mınıstr Ermekbaev

ASTANA. QazAqparat - Qazaqstanda úkimettik emes uıymdarǵa grant retinde beriletin bıýdjet qarjysynyń kólemi artyp keledi. Oǵan qosa, atalǵan uıymdar shetelden de qarjy alyp otyrady, dep xabarlaıdy QazAqparat tilshisi.

QR Din isteri jáne azamattyq qoǵam mınıstri Nurlan Ermekbaevtyń aıtýynsha, aǵymdaǵy jylda úkimettik emes uıymdarǵa grant retinde beriletin aqshanyń jalpy somasy 588 mln teńgeni qurap otyr. "Qazirgi kezde arnaıy operator arqyly 41 jobaǵa aqsha bólindi. Aldaǵy ýaqytta taǵy 14 jobaǵa grant beriletin bolady. Osylaısha, 55 joba granttyq negizde qarjylandyrylady. Negizi, bıyl úkimettik emes uıymdarǵa bólingen qarjynyń somasy byltyrǵy kórsetkishten salystyrǵanda úsh esege artyq bolyp otyr. Ótken jyly 200 mln teńge bolsa, bıyl 600 mln-ǵa jýyqtady. Kelesi jyly bıyldan da kóp bolýy kerek", - dedi Ermekbaev búgin Úkimet úıinde ótken baspasóz máslıxatynan keıin.

Mınıstrdiń aıtýynsha, úkimettik emes uıymdar úshin shetelden qarjy tartýǵa tyıym joq. Alaıda ondaı qarjylandyrý kózderi boıynsha salyq organdaryna esep berip turý qajet. Mınıstrlik te óz kezeginde qadaǵalaý sharalaryn júrgizedi.