Úkimettik emes uıymdardyń konkýrstyq qujattary eki ese azaıtylýy múmkin
Aqparat jáne qoǵamdyq damý salasyndaǵy qoǵamdyq keńestiń otyrysynda QR Aqparat jáne qoǵamdyq damý mınıstrligi Azamattyq qoǵam isteri komıtetiniń tóraǵasy Madııar Qojahmet osyndaı málimet berdi.
«Aýyldyq jerlerdegi azamattyq sektordyń qajettilikterin zerdeleý úshin sondaǵy úkimettik emes uıymdarmen kezdesýler uıymdastyrý josparlanyp otyr. Bizdiń aldymyzda aýyldardaǵy úkimettik emes uıymdardyń suranystaryna granttyq qarjylandyrý júıesin beıimdeý, olardy alýdyń jeńildetilgen rejımin engizý mindeti tur. Sondaı-aq, aýyldaǵy úkimettik emes uıymdardyń sandyq jáne sapalyq quramyna taldaý júrgiziledi», - degen vedomstvo ókili úkimettik emes uıymdardyń qolyn memlekettik qarjylandyrdyń barlyq túrine jetkizý mindeti qoıylyp otyrǵanyn eske saldy.
«Ol úshin granttyq qarjylandyrý protsesteriniń bárin avtomattandyrý josparlanýda. Bul jaǵdaıda operator ár túrli derekter bazasymen, Úkimettik emes uıymdar derekqory, Memlekettik kirister komıtetiniń derekqory sııaqty basqa da derekqorlarmen ıntegratsııalaý esebinen qajetti qujattardy derbes jınaıtyn bolady. Aýyldardaǵy úkimettik emes uıymdar úshin qujattardy usynýdyń erekshe tártibin engizgeli jatyrmyz», - dedi Madııar Qojahmet.
Komıtet tóraǵasy volonterlik týraly zańnyń qalaı daıyndalyp jatqanyn da baıandady.
«Biz memlekettik emes uıymdardyń konkýrstarǵa qatysý úshin usynatyn qujattarynyń sanyn eki ese – 9 qujattan 5 qujatqa deıin azaıtýdy usynamyz. Buǵan qosa, úkimettik emes uıymdardyń granttyq qarjylandyrý operatorynyń aldyndaǵy eseptiligin ońaılatý josparlanyp otyr. Sondaı-aq, bıyl Volonterlik týraly zań jobasy aıasynda granttyq qarjylandyrý salasyndaǵy zańnamaǵa birqatar ózgerister daıyndalyp jatyr. Zań jobasy sheńberinde granttardyń túrlerin engizý, ortalyq memlekettik organdarǵa granttardy iske asyrý quzyretin berý, qarjylandyrý jáne ákimshilendirý protsesterin retteý josparlanýda. Bul zań jobasy kelesi aıdan bastap Májilis qaraýyna engiziledi», - dedi Azamattyq qoǵam isteri komıtetiniń tóraǵasy.
