Úkimettik emes uıymdardyń «ASAR» respýblıkalyq forýmy bıyl Pavlodarda ótedi

NUR-SULTAN. QazAqparat – Úkimetti emes uıymdar-bıznes-memleket seriktestiginiń «ASAR» IIІ Respýblıkalyq forýmy bıyl Pavlodar qalasynda ótedi, dep habarlaıdy QazAqparat.

ÚEU-bıznes-memleket seriktestiginiń «ASAR» IIІ respýblıkalyq forýmy Pavlodar qalasynda 21-22 tamyzda ótedi.

Forým jergilikti qoǵamdastyqtyń áleýmettik máselelerdi sheshýde bıznes, úkimettik emes sektor jáne memlekettik organdardyń kúsh-jigerin belsendi etýge baǵyttalǵan.

Forým «ár jyly – jańa óńir» qaǵıdasy boıynsha ótýde, bul el deńgeıinde, sondaı-aq, óńirlik kontekstti tolyǵymen zerdeleý maqsatynda úsh jaqty yntymaqtastyq qarqynyn kórsetýge múmkindik beredi. Alǵashqy «ASAR» forýmy 2017 jyly Atyraýda, ekinshi forým 2018 jyly Taldyqorǵanda ótkizilgen.

Forým jumysyna bıznes-qurylym, otandyq jáne halyqaralyq ÚEU, sarapshylar qaýymdastyǵynyń, ortalyq jáne memlekettik organdar ókilderiniń qatysýy kútilýde.

Aqparat jáne qoǵamdyq damý mınıstrliginiń málimetinshe, forým jumysy 4 baǵytta: SOCIAL – ASAR «Bıznestiń áleýmettik salany damytýǵa qatysýynyń tıimdi modelderi», ECO – ASAR «Jasyl» seriktestiń formatyndaǵy álem», IT – ASAR «Áleýmettik salanyń ınnovatsııalyq damýyndaǵy IT jobalardyń róli» jáne INCLUSIVE – ASAR «Inklıýzıvtik qoǵam ýaqyty» ótkiziledi.

Eki kúndik forým sheńberinde «Áleýmettik ınnovatsııalar: óńirlik damý jetistiginiń formýlasy» taqyrybynda plenarlyq otyrys ótkiziledi.

Onyń aıasynda úsh jaqty áriptestikti jáne onyń tetikterin damytý, áleýmettik ınvestıtsııalar baǵyttarynyń paradıgmasyndaǵy bıznestiń qyzmeti, «kishi» otandy damytýǵa áleýmettik ınvestıtsııalar jáne t.b. máselelerdi talqylaý josparlanýda.

Sonymen qatar, sheberlik sabaqtary, case-study semınarlaryn, workshop-tar (praktıkýmder), «#7 Spıker» ıntellektýaly konferentsııasyn uıymdastyrý jáne memorandýmǵa qol qoıý josparlanǵan.

Sonymen birge, alǵash ret «ASAR activity» jobasyn uıymdastyrý josparlanýda, onyń sheńberinde forým qatysýshylary «Birge – taza Qazaqstan» respýblıkalyq aktsııasyna qosylatyn bolady.

Sondaı-aq, platformada ÚEU áleýmettik jobalarynyń konkýrsy ótkizildi. 144 ótinimniń ishinen ÚEU-nyń
100 jobasy úzdik dep tanyldy. Forým barysynda atalǵan jobalardyń tanystyrylymyn ótkizý josparlanýda.

Árbir tilek bildirýshi forým jumysyna onlaın-tirkeýden ótip qatysa alady.

Forýmnyń Qazaqstan Respýblıkasynyń Aqparat jáne qoǵamdyq damý mınıstrligi, Pavlodar oblysynyń ákimdigi jáne «Azamattyq bastamalardy qoldaý ortalyǵy» KEAQ uıymdastyrady.

Forýmnyń negizgi seriktesteri Eurasian Resources Group (ERG), Konrad Adenaýer atyndaǵy qor jáne «Atameken» UKP.