Úkimettik emes uıymdardyń 153 áleýmettik jobasy júzege asyrylýda - Qyzylorda
Bul týraly oblystyq ishki saıasat basqarmasynyń basshysy Aıdyn Qaırýllaev jýrnalıstermen ótken brıfıngte aıtty, dep habarlady QazAqparat tilshisi.
«Basqarma tarapynan aımaqtaǵy qoǵamdyq, saıası, dinı ahýal turaqtylyǵyn qamtamasyz etý maqsatynda aýqymdy ister atqarylyp keledi. Mysaly, jyl basynan beri «Yqtımal áleýmettik shıelenis oshaqtary Kartasyna» 44 másele engizilip, I jartyjyldyq qorytyndysy boıynsha onyń 12-si sheshimin tapty.
Oǵan qosa, ústimizdegi jyly oblysta memlekettik áleýmettik tapsyrys arqyly úkimettik emes uıymdardyń 153 áleýmettik jobasy júzege asyrylýda. Qoǵamdyq keńes qyzmetiniń ashyqtyǵyn qamtamasyz etý maqsatynda aqparattyq-konsýltatsııalyq ortalyq ashyldy. Bul Ortalyqta turǵyndardy tolǵandyrǵan máseleler tyńdalyp, taldanyp, tıisti sharalar jasalýda.
Sondaı-aq, 2017 jylǵa arnalǵan qoǵamdyq-saıası mańyzdy sharalardyń kúntizbelik josparyna sáıkes basqarmanyń uıymdastyrýymen Alashorda qozǵalysynyń 100 jyldyǵyna arnalǵan «Alash murasy jáne Táýelsiz Qazaqstan» halyqaralyq ǵylymı-teorııalyq konferentsııa ótti, qalanyń kórikti jerinen qoǵam jáne memleket qaıratkeri Mustafa Shoqaıǵa eskertkish ashyldy, «Tarıhtan taǵylym - ótkenge taǵzym» atty halyqaralyq forýmy jáne Semeı polıgonynyń jabylýyna 26 jyl tolýyna oraı oblystyq konferentsııasy ótti.
Qazirgi tańda, Elbasy N.Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasynda kórsetilgen maqsat-mindetter júıeli túrde júzege asyrylýda. Basqarma janynan «Rýhanı jańǵyrý» baǵdarlamasyn júzege asyratyn jobalyq keńse ashylyp, birqatar jobalar men aqparattyq jumystar iske asyrylyp jatyr. Ári bul baǵyttaǵy jumystar ary qaraı jalǵasatyn bolady» - dep túıindedi basqarma basshysy A.Qaırýllaev.
