Úkimettik emes uıymdardy granttyq qarjylandyrý júıesi engiziledi - MSM
ASTANA. QazAqparat - Búgin Senattyń Halyqaralyq qatynastar, qorǵanys jáne qaýipsizdik komıtetiniń keńeıtilgen otyrysy ótti. Onda komıtet músheleri «Qazaqstan Respýblıkasynyń keıbir zańnamalyq aktilerine úkimettik emes uıymdardyń qyzmeti máseleleri boıynsha ózgerister men tolyqtyrýlar engizý týraly» zań jobasyn talqylady.
Atalǵan zań jobasy azamattardyń áleýmettik bastamalaryn iske asyrýdyń pármendi quraly bolýǵa tıisti qazaqstandyq qoǵamdy odan ári áleýmettik jańǵyrtý jáne azamattyq qoǵam ınstıtýttaryn jetildirý maqsatynda Elbasynyń tapsyrmasyna sáıkes ázirlengen. Bul rette qujatta úkimettik emes uıymdardyń mártebesin, olardyń qyzmetteriniń erekshelikterin eskere otyryp, quqyqtyq retteý tetikterin jetildirý, sonymen birge qoǵamdyq birlestikterdi memlekettik qoldaý sharalaryn qamtıdy. Sondaı-aq zań jobasyna sáıkes, memlekettik organdar úkimettik emes uıymdarmen ózara is-qımylyn jetildirýde birqatar baǵyttar boıynsha sharalar atqaratyn bolady. Atap aıtqanda, ÚEU úshin memlekettik, memlekettik emes granttar men respýblıkalyq jáne óńirlik deńgeıdegi áleýmettik mindetterdi sheshýge edáýir úles qosqandary úshin syıaqylar túrinde qarjylandyrýdyń jańa nysandary engiziledi. Budan bólek, memleket pen qoǵamda bolyp jatqan protsesterge jedel den qoıý maqsatynda ÚEU granttyq qarjylandyrý salasyndaǵy biryńǵaı operatordyń fýnktsııalaryn oryndaıtyn uıym qurylady. Sondaı-aq zań jobasy sheńberinde ÚEU jaýaptylyǵyn naqtylaý, olardyń qoǵam aldyndaǵy ashyqtyǵyn qamtý qaǵıdattary da qarastyrylyp otyr. «Tutastaı alǵanda, zań jobasy arqyly ÚEU jobalaryn granttyq qarjylandyrý engiziledi. Osyǵan oraı, qujattyń basta maqsaty ÚEU qoldaý, olardy jetildirý men damytý bolyp tabylady. Granttardan bólek, ÚEU úshin arnaıy syıaqylar taǵaıyndalady. Jańa erejege sáıkes, granttar ÚEU-ǵa beıimdendirilgen konkýrstar arqyly berilmek. Syıaqylar jyl saıyn ÚEU úshin 15 atalym boıynsha uıymdastyrady», - dedi Mádenıet jáne sport vıtse-mınıstri Marat Ázilhanov. Onyń aıtýynsha, syıaqylar ÚEU ózara árekettestik jónindegi Úılestirý keńesiniń usynymdary boıynsha júzege asady, al kandıdattar qoǵamdyq jáne memlekettik organdar tarapynan usynylady. Qujatty talqylaýdan soń senatorlar zań jobasyn palatanyń aldaǵy ýaqytta ótetin jalpy otyrysyna shyǵarý týraly sheshim qabyldady.
