Úkimettik emes uıymdar túrmelerde bosanyp jatqan áıelderge jaǵdaı jasaýdy surady
ASTANA. 14 sáýir. QazAqparat /Gúlmıra Álıakparova/ - Astana qalasynyń úkimettik emes uıymdary temir tordyń arǵy jaǵynda bosanyp jatqan áıelderge laıyqty jaǵdaı jasaý máselesin kóterdi.
2011-2015 jyldarǵa arnalǵan «Salamatty Qazaqstan» memlekettik baǵdarlamasynyń negizgi baǵyttaryn júzege asyrý maqsatynda búgin, Astana qalasynyń ákimdiginde ótken ana men bala densaýlyǵyn qorǵaý máselesine arnalǵan dóńgelek ústel otyrysy barysynda «Reabılıtatsııalyq tehnologııalar men tujyrymdamalar» qoǵamdyq qorynyń bastyǵy Orynbasar Quljabaeva, Qazaqstanda temir tordyń arǵy betine toǵytylǵan júkti áıelderge laıyqty medıtsınalyq qyzmet kórsetilmeıtindigin aıtyp qynjyldy.
O.Quljabaeva atap kórsktendeı, áıelder bas bostandyǵynan aıyrylsa-daǵy, olardy deni saý bolý quqyǵynan eshkim aıyrǵan joq. Túrmelerde birinshiden - perzenthanalar, ekinshiden -pedıatrlar joq. Onymen birge, júkti áıelderdiń densaýlyǵyn únemi qadaǵalap otyratyn arnaıy mamandar qarastyrylmaǵan. «Men birqatar óńirlerdiń túrmelerinde boldym. Onymen birge, júkti áıelder Tergeý ızolıatorlaryna jetkizilgende shylym shegetin, týberkýlez jáne ınfektsııalyq basqa da aýrýlarmen aýyratyn áıeldermen birge jalpy abaqtyǵa otyrǵyzylady. Túrmelerde áıelder bosaný kezinde ajal qushpas úshin, náresteler ınfektsııalardy juqtyrmas úshin mende naqty usynystar bar», - deıdi ol.
Astana qalasynyń Densaýlyq saqtaý basqarmasy bastyǵynyń orynbasary Laýra Ahmetnııazovanyń aıtýynsha, jabyq mekemelerde medıtsınalyq qyzmet kórsetýde problemalardyń barlyǵyn jasyrmady. Sebebi, Qylmystyq-atqarý júıesi komıtetine qarasty mekemelerde medıtsınalyq qyzmet kórsetý máselesi QR Densaýlyq saqtaý mınıstrliginiń quzyryna kirmeıdi. Ondaǵy medıtsınalyq qyzmetti QAJK-niń medıtsınalyq qyzmetteri uıymdastyrady.
Degenmen, onyń sózine qaraǵanda, Astanadaǵy jabyq mekemeler qalalyq emhanalarǵa tirkelgen. Bas bostandyǵynan aıyrylǵan áıelder qajetti jaǵdaıda dıagnostıkalyq tekserýlerden ótip, mamandardyń keńesterin alatyn kórinedi. «Meniń bilýimshe, qazir QAJK-nyń medıtsınalyq qyzmetterin kezeń-kezeńimen Densaýlyq saqtaý mınıstrliginiń quzyryna berý týraly buıryq shyqty. Bul máseleniń túıitkili kóp ekendigin jasyrmaımyn», - dedi ol.
