Úkimettik emes uıymdar men memleket arasyndaǵy baılanys bir júıege keltirildi - Mádenıet jáne aqparat mınıstrligi

sp;ASTANA. Qarashanyń 23-i. QazAqparat /Aıdar Ospanalıev/ - Azamattyq forým nebári 6 jyldyń ishinde dástúrge aınalyp, qoǵam ómirindegi eleýli oqıǵalardyń birine aınalyp otyr. «Esterińizde bolsa, Elbasy II Azamattyq forýmda, «biz úshin úkimettik emes uıymdar men memleket arasyndaǵy áriptestik qatynastardy damyta berýdiń mańyzy aıryqsha zor», degen bolatyn. Al búgingi forým Memleket basshysynyń osy mindetiniń talapqa saı oryndalyp jatqandyǵynyń kórinisi dep esepteımin», dedi búgin Mádenıet jáne aqparat mınıstrliginiń jaýapty hatshysy Janna Qurmanǵalıeva.

Bul týraly ol búgin Astanada ótip jatqan IV Azamattyq forým barysynda málim etti, dep habarlaıdy QazAqparat.

Jaýapty hatshynyń sózine qaraǵanda, azamattyq forým tarıhy - elimizde azamattyq qoǵamnyń qalyptasyp kele jatqandyǵynyń jarqyn kórinisi. Jalpy búginde eldegi kóptegen salalardy úkimettik emes uıymdardyń kómeginsiz damytýdy kózge  elestetý múmkin emes. «Sondyqtan da bolar, 2003 jyly elde ótken I Azamattyq forýmda Memleket basshysy úkimettik  emes sektordy nyǵaıtýdy memlekettiń basym baǵyty etip belgiledi. Sol jyly ótken jıynda memleket pen úkimettik emes uıymdardyń ekijaqty birlesken qımyldarynyń júıeli negizi qalandy. Al 2005 jyly ótken II Azamattyq forýmda azamattyq qoǵamdy damytýdyń 2006-2011 jyldardy qamtıtyn tujyrymdamasy qabyldandy. Onyń birinshi kezeńi boıynsha atqarylýy tıis jumystar bıyl aıaqtalady. Sondaı-aq III Azamattyq forým ekijaqty áriptestik qatynasty damytý uranymen ótti. Onda kóptegen memlekettik organdar úkimettik emes sektor aldynda alǵash ret esep berdi. Osy turǵydan alǵanda, ótken jyldar ishinde úkimettik emes uıymdar men memleket arasyndaǵy baılanys bir júıege keltirildi deýge tolyq negiz bar», dedi ol.