Úkimettik emes uıymdar QR Úkimeti men Parlamentine múgedek balalardyń problemalaryna qatysty birqatar usynystar bermek

Bul týraly búgin «Radýga» múgedek balalar analarynyń qoǵamdyq birlestiginiń prezıdenti Natalııa Koloskova «Búkil álem saýsaq ushynda!» atty qoǵamdyq kompanııa jobasynyń aıaqtalýyna arnalǵan baspasóz máslıhatynda málim etti.

Onyń aıtynsha, elimizdiń eki qalasy - Almaty men Qaraǵandyda ǵana soqyr jáne nashar kóretin balalarǵa arnalǵan oblystyq ınternattar jumys isteıdi. Onda olar Braıl (bul álippe soqyrlar úshin oqyp, jazatyn negizgi júıe) álippesimen saýat ashyp, orta bilim alady. «Al qalǵan aımaqtardaǵy múgedek balalardyń tipti orta bilim alýǵa da múmkindikteri joq. Qazirgi tańda elimizde bilimsiz soqyr balalardyń jańa bir býyny qalyptasyp otyr. Bul balalar jazyp, oqı almaıdy, sondyqtan olardyń kolledjderde, joǵary oqý oryndarynda bilim alý múmkinshilikteri shektelgen», deıdi N.Koloskova.

Elimizdiń medıtsınalyq derekterine júginip, jylyna 4000-ǵa jýyq sábı damýyndaǵy ártúrli aýytqýlarmen dúnıege keletinin aıtqan onyń sózine qaraǵanda, Qostanaı oblysynda 2137 múgedek bala bolsa, sonyń 137-si kóz janary boıynsha múgedekter, al Astana qalasynda 30-ǵa jýyq sábıdiń kózi múldem kórmeıdi eken.

«Búkil álem saýsaq ushynda!» atty qoǵamdyq kompanııa barysynda Qostanaı men Astanada 300 zaǵıp balanyń ata-analary arasynda saýalnama júrgizilgen. «Saýalnama barysynda zaǵıp balalar ata-analarynyń 90 paıyzy turǵyn úıge, 30 paıyzy psıhologııalyq kómekke zárý ekendigi, al 99 paıyzy psıhologııalyq, zańgerlik, áleýmettik, medıtsınalyq jáne basqa da kómekterdi qaıdan alatyndyqtaryn bilmeıtindigi anyqtaldy», deıdi qoǵamdyq birlestiktiń basshysy.

Osyǵan oraı elimizdiń úkimettik emes uıymdary QR Úkimeti men Parlamentine birqatar usynystar ázirlegen. Olardyń qatarynda múgedek balalardyń qoǵammen yqpaldasýy jáne olardyń otbasyn qoldaý boıynsha ulttyq baǵdarlama ázirleý, bilim berýdiń normatıvtik jáne ádistemelik bazasyn qurý, sonymen qatar ergoterapevt, Braıl álippesin oqytý, júrý, sensomotorıka sııaqty mamandyqtar týraly túsinikti memlekettik bilim berý standaryna engizý, joǵaryda atalǵan qujattardy ázirleý jáne qurýǵa múmkindigi shekteýli adamdardyń problemalarymen aınalysatyn úkimettik emes uıymdardy tartý sııaqty usynystary bar.