Úkimettik emes uıymdar keı kezde memlekettik organdardyń qyzmetin atqaryp jatady - M.Qul-Muhammed

ASTANA. 2 qazan. QazAqparat - Búgin QR Mádenıet jáne aqparat mınıstri Muhtar Qul-Muhammedtiń tóraǵalyǵymen el Úkimeti janyndaǵy úkimettik emes uıymdarmen ózara is-qımyl jónindegi úılestirý keńesiniń otyrysy ótti.

Mınıstr atap kórsetkendeı, Táýelsizdiktiń alǵashqy jyldary Qazaqstandaǵy san alýan úkimettik emes uıymdar shetelden qarjylandyryldy. «Búginde sol myńdaǵan uıymdar memlekettik ortalyq organdardyń tolyqqandy áriptesine aınalyp otyr. Olar halyq arasynda san alýan zertteý jumystaryn júrgizip, ár sala boıynsha qordalanǵan máselelerdi sheship keledi. Shyny kerek, úkimettik emes uıymdar keı kezde memlekettik organdardyń qyzmetin de atqaryp jatady. Osyǵan oraı, budan úsh jyl buryn bıýdjetke tıisti ózgerister men tolyqtyrýlar engizilip, qazir árbir mınıstrlik óz salasy boıynsha úkimettik emes uıymdarmen jumys isteıdi. Bul óte durys sheshim boldy», - deıdi M.Qul-Muhammed. Aıta keteıik, Qazaqstan Úkimeti janyndaǵy úkimettik emes uıymdarmen ózara is-qımyl jónindegi úılestirý keńesiniń búgingi otyrysynda memlekettik-áleýmettik tapsyrystardy ortalyq jáne jergilikti jerde ornalastyrý, VI Azamattyq forýmdy ótkizý jáne 2013-2015 jyldary respýblıkalyq bıýdjetten qarjy bólý máselesi qaraldy. Sondaı-aq «Úkimettik emes memlekettik qoldaý týraly» Zań jobasy talqyǵa salyndy.