Úkimettik emes uıymdar densaýlyq saqtaý qyzmetkerlerine biliktilik emtıhandaryn ótkizetin bolady

ASTANA. 5 tamyz. QazAqparat /Qanat Mámetqazyuly/ - Búgin Densaýlyq saqtaý mınıstrliginde úkimettik emes uıymdar ókilderiniń, medıtsınalyq jáne farmatsevtıkalyq qyzmetti baqylaý komıtetiniń jáne aýmaqtyq organdarynyń qyzmetkerleriniń qatysýymen jıyn bolyp ótti.

Onda densaýlyq saqtaý salasynda úkimettik emes uıymdar tarapynan biliktilik emtıhandaryn ótkizý jónindegi jobanyń júzege asyrylý barysy talqylandy.

Aǵymdaǵy jyly Qazaqstan Respýblıkasynyń densaýlyq saqtaý salasyn damytýdyń 2011-2015 jyldarǵa arnalǵan «Salamatty Qazaqstan» memlekettik baǵdarlamasyn iske asyrý aıasynda bıýdjetten azamattyq qoǵamdy jáne úkimettik emes uıymdardy tartý sharalary da kózdeledi. «Memlekettik baǵdarlamada sektoraralyq ózara áreket máselesine basa mańyz berilip otyr. Osyǵan oraı, birqatar jobalardy júzege asyrýǵa azamattyq qaýymdastyq pen úkimettik emes uıymdardy qatystyrý kózdelýde. Bul áleýmettik tapsyrys aıasynda oryndalatyn sharalardyń bir baǵyty densaýlyq saqtaý salasynda biliktilik emtıhandaryn ótkizýge 12 mln. teńge qarajat qarastyrylǵan», - deıdi Medıtsınalyq qyzmet kórsetý salasyn baqylaý komıtetiniń basqarma bastyǵy
Gúlnár Alpysbekova.

Onyń aıtýynsha, atalǵan joba eń aldymen medıtsına qyzmetkerleriniń kásiptik ortadaǵy biliktilik deńgeıin anyqtaýǵa baǵyttalady. Bundaı másele negizinen mamandardyń teorııalyq jáne praktıkalyq daǵdylaryn joǵary deńgeıde meńgerýine yqpal etetin bolady. «Búgingi kúni áleýmettik tapsyrys sheńberinde biz 4 úkimettik emes uıymdarmen yntymaqtasatyn bolamyz. Atalǵan uıymdar tórtinshi toqsannan bastap, biliktilik emtıhandaryn júrgizýge kirisetini kózdelip otyr», - deıdi G. Alpysbekova.