Úkimettik emes uıymdar: BQO-da 163 jobany júzege asyrýǵa 1,2 mlrd teńge bólindi
Jıynǵa qatysqan Batys Qazaqstan oblysynyń ákimi Narıman Tóreǵalıevtiń málim etkenindeı, azamattyq qoǵamdy damytý, bılik pen qoǵamnyń birlestigi men áriptestik saıasatyna qatysty máseleniń barlyǵy Memleket basshysy Qasym-Jomart Toqaevtyń únemi nazarynda.
Prezıdenttiń «Halyq únine qulaq asatyn memleket» tujyrymdamasynda qoǵam atynan sóıleıtin úkimettik emes uıymdar men bılik arasyndaǵy altyn kópirdi bekitý mańyzdy tetikterdiń biri retinde belgilendi.
Óńir basshysynyń aıtýynsha, úkimettik emes sektordyń qoǵamdaǵy úles salmaǵyn kóbeıtý, olardyń belsendi jumysyna barynsha qoldaý kórsetý – basty maqsat.
Sebebi, bul baǵyt – Ádiletti Qazaqstan qurý jolyndaǵy zor tetikterdiń biri. Qoǵamdaǵy turalap qalǵan salalardyń boıyna qan júgirtip, kúrmeýi kóp kúrdeli máselelerdiń sheshilýine úles qosyp júrgen – osy qoǵamdyq uıymdar.
Olardyń basyn biriktirip, qyzmetin shyńdaıtyn Azamattyq forýmdar azamattyq qoǵam damýynyń kórsetkishi retinde syndarly suhbat pen qundy usynystar aıtylatyn dıalog alańyna aınalyp otyr.
«Óńirimizde osymen on birinshi ret ótkizilip otyrǵan bul basqosýdyń mán-mańyzy zor. Azamattyq qaýymdastyq – bılik pen halyq arasyndaǵy altyn kópir. Olar tek oblys ortalyqtarynda ǵana emes, aýyldyq jerlerde de mańyzdy máselelerdi sheshýge atsalysýda. Batys Qazaqstan oblysynda 670 úkimettik emes uıym tirkelgen. Onyń ishinde 100-ge jýyǵy belsendi qyzmet atqaryp, túrli deńgeıdegi qoǵamdyq keńesterdiń, konsýltatıvti-keńesshi organdardyń quramynda jáne túrli salalarda tıimdi jumys jasaýda. 2023 jyly Batys Qazaqstan oblysy boıynsha 163 jobany júzege asyrý úshin jergilikti bıýdjetten 1 mlrd 227 mln teńge bólindi. Oblysta memlekettik áleýmettik tapsyrysty 5 salalyq basqarma, Oral qalasy men 12 aýdannyń ákimdigi júzege asyrady. Belsendi jumys júrgizip, halyqtyń áleýmettik mańyzdy máselelerin sheshýge atsalysqan úkimettik emes uıymdarǵa QR Aqparat jáne qoǵamdyq damý mınıstrligi jyl saıyn syıaqy taǵaıyndap otyr. Ótken jyly atalǵan syıaqy belsendi qyzmet atqarǵan 3 uıymǵa berilse, 2 úkimettik emes uıym alǵash ret ótkizilgen «Tańdaý» syılyǵynyń ıegeri atandy. Sońǵy tórt jyldyń ishinde 21 úkimettik emes uıym jumysy joǵary baǵalanyp, óńirimiz respýblıka boıynsha jaqsy nátıje kórsetken oblystardyń qataryna endi», dedi N.Tóreǵalıev.
QR Aqparat jáne qoǵamdyq damý mınıstrligi Azamattyq qoǵam isteri komıteti tóraǵasynyń orynbasary Perızat Sádýaqas Memleket basshysynyń qoǵamdy damytý máselesine basa kóńil bólip otyrǵanyn, Ulttyq quryltaıda qoǵam ókilderiniń aıtqan usynys-pikirleri eleýsiz qalmaıtynyn jetkizdi.
Sondaı-aq Perızat Qurmanqyzy úkimettik emes uıymdardy qoldaýda Batys Qazaqstan oblysynda oń ózgeris bar ekendigin atap ótti.
Qazaqstan Azamattyq alıansynyń prezıdenti Baný Nurǵazıeva eki jylda bir ret uıymdastyrylatyn Azamattyq forýmnyń bıyl qazan aıynda Astana qalasynda ótetinin aıtty.
«Azamattyq qoǵam damysa, el de damıdy. Ádiletti Qazaqstan qurý úshin oǵan bárimiz úles qosa bilýimiz kerek. Mádenıetti qoǵam qurýymyz kerek. Prezıdent saıasatyna sáıkes úkimet halyq únine qulaq asýy tıis. Osy oraıda memlekettik organdar úkimettik emes uıymdarmen tyǵyz baılanysta jumys jasaýy qajet. Árbir basqarma, árbir memlekettik organ, ár aýdan ákimi qoldarynan kelgenshe ózderiniń bıýdjetterine osy uıymdar úshin áleýmettik tapsyrys retinde qarajat qarastyrsa deımiz. Degenmen oblysta 21 basqarmanyń tek beseýi ǵana azamattyq qoǵammen jumys jasaıdy eken. Áleýmettik tapsyrys ta jumys qoı, sondyqtan buǵan mán bereıik», dedi B.Nurǵazıeva.
«Ardagerler keńesi» RQB ortalyq keńesi tóraǵasynyń birinshi orynbasary, akademık, tarıh ǵylymdarynyń doktory Ómirzaq Ozǵanbaı óz sózinde ulttyq salt-dástúr men otbasylyq tárbıege, memlekettik tildi ornyqtyrýǵa basa nazar aýdarý qajettigine toqtaldy.
Sondaı-aq «Batys-Qamqor» jastar qoǵamdyq birlestiginiń tóraǵasy Ádilet Berikqalıev atqarylǵan jumystar jóninde baıandasa, Batys Qazaqstan oblysy múgedek balalarynyń «Báıterek» qoǵamy» QB tóraıymy Merýert Sanqaeva bıznes pen úkimettik emes uıymdardyń arasynda baılanystyń áli de álsizdigin, birlesken jobalardy júzege asyrýǵa bolatyndyǵyn, oǵan qosa bıýdjetti qalyptastyrýǵa, bólýge qoǵamdyq birlestikter úles qosa alatyndyǵyn tilge tıek etti.
Forým barysynda basqa da usynys-pikirler aıtyldy.
