Úkimetten kelip túsetin zań jobalarynyń sapasy áli de jaqsartýdy qajet etedi - Májilis Tóraǵasy
ASTANA. 30 maýsym. QazAqparat /Qanat Mámetqazyuly/ - Úkimetten kelip túsetin zań jobalarynyń sapasy áli de jaqsartýdy qajet etedi. Búgin QR Parlamenti palatalarynyń birlesken otyrysynda, Parlamenttiń tórtinshi sessııasynyń jabylýy barysynda sóz sóılegen Májilis Tóraǵasy Oral Muhamedjanov osylaı málim etti.
Sóz arasynda O. Muhamedjanov zań shyǵarý úderisinde Úkimetpen udaıy birge jumys isteıtindikten qarym-qatynastyń syndardy sıpatta bolýyna nazar aýdarylatynyn jetkizdi. Degenmen, Tóraǵa bundaı birlesken jumysta sheshimin tappaı kele jatqan máselelerdiń az emes ekendigin de atap ótti. «Mysaly, Parlament Májilisiniń qaraýyna engiziletin zań jobalarynyń sapasy týraly qanshama aıtylǵanymen, bul máselede kóńil kónshiterlik nátıje joq deýge májbúr bolyp otyrmyz. Zań jobalaryna qatysty engiziletin materıaldar da tıisinshe rásimdelmeıdi. Naq osy sebepten ótken sessııa ishinde Úkimetten túsken 130 zań jobasynyń 72-i nemese jartysynan astamy alǵash kelgen kezinde tirkelmeı, keri qaıtaryldy. Sonyń ishinde 28 joba qazaq tilindegi mátininiń sapasyna baılanysty qabyldanbady», - dedi O. Muhamedjanov. Sonymen birge, spıker salyq kodeksine jıi jáne kóptep ózgeris engizý praktıkasynyń turaqty úrdiske aınalǵanyna qobaljý bildirdi. «Máselen, 2010-2012 jyldarǵa arnalǵan respýblıkalyq bıýdjetti túzetýge baılanysty «QR keıbir zańnamalyq aktilerine salyq salý máseleleri boıynsha ózgerister men túzetýler engizý týraly» zań jobasyn qaraý kezinde Májilis depýtattary onyń bıýdjet protsesine múldem qatysy joq bóligin alyp tastady», - dedi Májilis Tóraǵasy.
