Úkimette «Jumyspen qamtý jol kartasy-2020» baǵdarlamasyn júzege asyrý máseleleri talqylandy

ASTANA. 9 shilde. QazAqparat - Búgin Úkimet úıinde QR Premer-Mınıstri Serik Ahmetovtiń tóraǵalyǵymen «Jumyspen qamtý jol kartasy-2020» baǵdarlamasyn júzege asyrý boıynsha selektorlyq rejımde vedomstvoaralyq komıssııanyń otyrysy ótti. Bul týraly primeminister.kz saıtynan habarlandy.

Otyrys barysynda QR Eńbek jáne halyqty áleýmettik qorǵaý mınıstri T. Dúısenova jobalardy irikteý men bólý ólshemderin jáne ınfraqurylymdar men turǵyn úı-kommýnaldyq sharýashylyqtaryn damytý arqyly jumyspen qamtý boıynsha baǵdarlamanyń birinshi baǵytyn júzege asyrý barysyndaǵy qarjy lımıtterin anyqtaý krıterıılerin tanystyrdy.

Onyń aıtýynsha, birinshi baǵyt boıynsha qarastyrylǵan 20 mlrd. teńge bekitilgen krıterııler negizinde júzege asyrylýy tıis, 5% respýblıkalyq menshik nysandaryna; 95% jergilikti mańyzdaǵy nysandarǵa bólinetin bolady.

Óz kezeginde, óńirler arasynda qarjy 80% turǵyndardyń sanyn esepke ala otyryp, 20% ótken kezeńde jumyspen qamtý baǵdarlamasyna qatysýshylardyń eńbekpen qamtylýy, jumyssyzdar sanynyń qysqarýy, áleýmettik az qamtylǵan turǵyndardyń ózin-ózi nátıjesiz jumyspen qamtýshylyǵyna baılanysty kórsetkishteri boıynsha oblystar jumysynyń nátıjeliligine qaraı bólinetin bolady.

Aǵymdaǵy jyly birinshi baǵyt sheńberinde júzege asyrylatyn jobalardy irikteý krıterıılerine «Jumyspen qamtý jol kartasy-2020» baǵdarlamasyna qatysýshylardyń jumyspen qamtylýy úshin qarastyrylǵan jumys oryndarynyń sany; ortasha jalaqy kólemi 35 myń teńgeden kem bolmaýy sharttary arqyly anyqtaý usynyldy.

Osylaısha, ústimizdegi jyly Baǵdarlamanyń birinshi baǵytyndaǵy jalpy somasy 19 mlrd. teńge bolatyn 14 oblys boıynsha 718 jobany júzege asyrý josparlanǵan. Sonymen qatar, 8415 jumys orny qurylsa, onyń 4926-sy Baǵdarlamaǵa qatysýshylarǵa arnalady.

Sondaı-aq, Óńirlik damý mınıstrligimen birlesip «Jumyspen qamtý jol kartasy-2020» baǵdarlamasynyń ekinshi baǵytynyń sheńberinde keshendi damytý maqsatynda ústimizdegi jyly tirek aýyldarynyń tizimi kelisildi. Tirek aýyldaryn keshendi damytý úshin «pılottyq» jobada elimizdiń alty óńirinen 11 aýyl anyqtalyp, alyndy.

Budan basqa, oblys ákimderiniń maqsatty ındıkatorlarǵa jetý jáne «Jumyspen qamtý jol kartasy-2020» baǵdarlamasyn oryndaýǵa bólingen bıýdjet qarjysynyń maqsatty jumsalýy boıynsha aralyq esep berý kestesi kelisildi.