Úkimette Joldaýdy iske asyrý barysy qaraldy
QR Premer-Mınıstri Asqar Mamınniń tóraǵalyǵymen jáne QR Parlamenti Májilisiniń Tóraǵasy N. Nyǵmatýlınniń qatysýymen ótken Jańǵyrtý jónindegi ulttyq komıssııanyń otyrysynda QR Prezıdentiniń 2019 jylǵy 2 qyrkúıektegi Joldaýyn iske asyrý boıynsha Jalpyulttyq is-sharalar josparyn oryndaý máseleleri qaraldy.
«Jańǵyrtý jónindegi ulttyq komıssııa jumysy Elbasy Nursultan Nazarbaevtyń erekshe baqylaýynda. Prezıdent Qasym-Jomart Toqaev óz Joldaýynda Komıssııa jumysyn jańǵyrtýdy tapsyrdy. Ótken otyrysta biz Komıssııanyń 2019-2020 jyldarǵa arnalǵan jumys josparyn jasadyq, qazir ol Prezıdentpen kelisildi», — dedi A. Mamın.
Azamattardyń júginýlerine qatysty jumystardyń tıimdiligin arttyrý boıynsha atqarylyp jatqan jumystar týraly Bas prokýrordyń orynbasary M. Ahmetjanov baıandady.
Bas prokýratýranyń Quqyqtyq statıstıka jáne arnaıy esepke alý komıteti «E-Ótinishter» AT-júıesin qurý boıynsha jumystardy júrgizip jatyr, bul júıeni 2020 jyldan bastap pılottyq rejımde iske qosý kózdelgen. Joba ótinim berýshilerdiń biryńǵaı derekter bazasyn qurýdy qarastyrady (JSN jáne BJN arqyly), onda olardyń sýbektilerge ótinishteriniń barlyq jazbalary saqtalatyn bolady. Bir mezette ótinishter sapasyn baǵalaý servısi engiziledi.
Temir jol tasymaly salasynda tarıf túzýdiń ashyqtyǵyn arttyrý jáne jetildirý, tutynýshylardyń quqyqtaryn qorǵaý máselesi boıynsha QR ındýstrııa jáne ınfraqurylymdyq damý vıtse-mınıstri A. Erjanov tıisti zań jobasy ázirlenip jatqanyn jetkizdi. Atap aıtqanda, jolaýshylar tasymalyn sýbsıdııalaýdyń ashyq júıesin qurý, sondaı-aq, jasyryn tranzıt shemalaryn paıdalanýdy boldyrmaý, kirme jol baǵyttary joldarynyń qyzmetterin tutynýshylardyń quqyqtaryn qorǵaý qarastyrylady.
Conymen qatar, Komıssııa azamattardyń qarjy uıymdaryna shekten tys bereshek bolýynyń aldyn alý sharalaryn, memlekettik ataýly áleýmettik kómek kórsetý tetikterin jetildirýdi, zeınetaqy júıesin jetildirý boıynsha atqarylyp jatqan jumystardy jáne basqa da máselelerdi qarastyrdy.
«Memleket basshysy óz Joldaýynda tıimdi qoǵamdyq dıalog pen adamdardyń qajettilikterine shuǵyl ún qatý memlekettik organdardyń jumysyndaǵy basty basymdyq ekenin basa aıtqan bolatyn. Búgingi talqylaýlardy eskere otyryp, bizdiń aldymyzǵa qoıylǵan mindetterdi sapaly oryndaý boıynsha naqty sharalar qabyldaý qajet», — dedi A. Mamın.