Úkimette jer qatynastary salasyn tsıfrlandyrý máseleleri qaraldy
Otyrysta QR Tuńǵysh Prezıdenti – Elbasy Nursultan Nazarbaevtyń bastamasymen qolǵa alynǵan «Tsıfrlyq Qazaqstan» memlekettik baǵdarlamasynyń iske asyrylý barysy jáne Memleket basshysy Qasym-Jomart Toqaevtyń el ekonomıkasyn tsıfrlandyrýdy jedeldetý jónindegi tapsyrmalarynyń oryndalýy qaraldy.
Tsıfrlyq damý, ınnovatsııalar jáne aeroǵarysh ónerkásibi mınıstri Asqar Jumaǵalıev jer qatynastary salasynda tsıfrlandyrýdy engizý, sondaı-aq memlekettik qyzmetterdi avtomattandyrý jáne ońtaılandyrý boıynsha qabyldanyp jatqan sharalar týraly baıandady.
«Tsıfrlyq Qazaqstan» memlekettik baǵdarlamasynda 2021 jylǵa qaraı Ulttyq keńistiktik derekterdiń ınfraqurylymynyń, Jyljymaıtyn múliktiń biryńǵaı memlekettik kadastrynyń aqparattyq júıesin qurý jáne engizý qarastyrylǵan. Bul Qazaqstannyń tsıfrlyq kartasyn qalyptastyrýǵa, halyqtyń jer qatynastary men sáýlet salasyndaǵy qyzmetterdi alý rásimin jeńildetýge, jer telimderin paıdalanýdy baqylaý men monıtorıng júrgizýdi avtomattandyrýǵa jol ashady.
Qazaqstannyń Tuńǵysh Prezıdentti – Elbasynyń 2018 jylǵy 5 qazandaǵy halyqqa arnaǵan Joldaýynda 2019 jyldyń sońyna deıin memlekettik qyzmetterdiń 80%, al 2020 jyldyń sońyna qaraı 90% elektrondy formatqa kóshirýdi qamtamasyz etý tapsyryldy. Osy jyldyń qyrkúıeginde túzetýler engizilgennen keıin Memlekettik qyzmetter tizilimi 723 qyzmetti qamtıdy, olardyń 579-y (80,08%) elektrondy túrde qoljetimdi bolady.
Otyrysty qorytyndylaı kele, QR Premer-Mınıstri Asqar Mamın tsıfrlyq kún tártibiniń mańyzdylyǵyn atap ótip, ekonomıka salasynda tsıfrlyq sheshimderdi engizý jumystaryn jandandyrýdy tapsyrdy.
