Úkimette jekeshelendirý máseleleri qarastyryldy
ASTANA. QazAqparat - Premer-mınıstr Baqytjan Saǵyntaevtyń tóraǵalyǵymen ótken Úkimet otyrysynda elimizde jekeshelendirýdi júrgizý barysy qaraldy. Sonymen qatar, jıynda 2017-2021 jyldarǵa arnalǵan Ónimdi jumyspen qamtý jáne jappaı kásipkerlik baǵdarlamasyn iske asyrý jaıy talqylandy.
Memleket basshysy bıylǵy Joldaýynda Úkimetke Keshendik jospar boıynsha uıymdardy jekeshelendirýdi jyldamdatyp, 2018 jyldyń sońyna deıin aıaqtaýdy tapsyrǵany málim. Bul baǵyttaǵy jumystarǵa esep bergen Ulttyq ekonomıka mınıstrliginiń málimetinshe, bıyl 280 uıym, al kelesi jyly 84 uıym satýǵa shyǵarylady. «Eır Astana» AQ, «Qazatomónerkásip» AQ UAK, «Qazaqtelekom» AQ, «QazMunaıGaz» UK» AQ, «Qazposhta» AQ, «Samuryq-Energo» AQ, «Qazaqstan temir joly» UK» AQ, «TaýKen Samuryq» UK» AQ tárizdi elimizdiń 8 iri aktıvin IPO/SPO-ǵa 2019-2020 jyldary shyǵarý josparlanǵan.
2016 jyldyń sońynda júrgizilgen vedomstvoǵa baǵynyshty uıymdardy túgendeýdiń qorytyndysy boıynsha Keshendi jekeshelendirý josparyna qosymsha 105 uıym men qyzmetterin memlekettiń qatysýymen jáne onymen úlestes tulǵalarmen aktsıonerlik qoǵam jáne jaýapkershiligi shekteýli seriktestik atqara alatyn, Úkimettiń qyzmet túrlerin aıqyndaıtyn qaýlysyna saı kelmeıtin 32 uıym engizilgen.
Ulttyq ekonomıka mınıstri Tımýr Súleımenov nysandar tizimin jasaǵanda túgendeý nátıjeleri negizge alynǵanyn, oǵan sáıkes memleket menshiginde - 6003 uıymdy saqtap qalý usynylǵanyn jetkizdi. Onyń ishinde 88%-ten astamy - áleýmettik sala uıymy bolsa, 447 kompanııa - kvazımemlekettik sektordan. Al 243 uıymdy taratý usynylǵan. Sondaı-aq, jekeshelendirýdiń ashyqtyǵy men tıimdiligin qamtamasyz etý, áleýetti ınvestorlardy kóbirek tartý maqsatynda «KAZNEX INVEST» AQ-tyń qosymsha ınternet-resýrsyn ashqany aıtyldy.
Munda jekeshelendiriletin nysandar jónindegi aqparattar usynylǵan jáne keshendi jekeshelendirý josparynyń oryndalýynyń júzege asyrylý barysy jaryq kóredi.
2016 jyldan bastap Jekeshelendirýdiń keshendik jospary boıynsha 51 mlrd. teńge somasyna 198 nysan, sonyń ishinde 7 mlrd. teńgege respýblıkalyq menshiktiń 18 nysany, 5 mlrd. teńgege kommýnaldyq menshiktegi 95 nysan, 39 mlrd. teńgege kvazımemlekettik sektordyń 85 nysany ótkizilgen.
Aǵymdaǵy ýaqytta Jekeshelendirýdiń keshendik josparyn oryndaý qaıta qurylǵan jáne taratylǵan nysandardy esepke alǵanda 47%-ti quraıdy.
Qarjy mınıstri Baqyt Sultanovtyń málimdeýinshe, Memleket basshysynyń tapsyrmalaryn iske asyrý aıasynda 2017 jyly 325 nysandy satý josparlanǵan, sonyń ishinde respýblıkalyq menshiktiń 30 nysany, kommýnaldyq menshiktiń 177 nysany, ulttyq holdıngterdiń 67 nysany men ÁKK-tiń 51 nysany bar. 2018 jyly 61 nysandy satý kózdelgen. 2017 jyly 29 tartymdy nysandy satý josparlanǵan, sonyń ishinde - «Samuryq-Qazyna» UÁQ» AQ-qa qatysty 20 nysan, «Báıterek» UBH» AQ-qa qatysty 1 jáne respýblıkalyq menshiktegi 8 nysan bar. Al 2018 jyly josparlanǵan 21 tartymdy nysannyń bireýi kommýnaldyq menshikke, 10 «Samuryq-Qazyna» UÁQ» AQ-qa, 3 «Báıterek» UBH» AQ, 3 «QazAgro» UBH» AQ-qa jáne 4-eýi respýblıkalyq menshikke tıesili.
Sondaı-aq, 2019-2020 jyldarǵa «Samuryq-Qazyna» UÁQ» AQ-tyń 18 iri kompanııasyn ótkizý josparlanǵan.
Taqyrypty talqylaı kele, Premer-mınıstr Baqytjan Saǵyntaev Qazaqstandaǵy jekeshelendirý baǵdarlamasyn odan ári iske asyrý boıynsha birqatar tapsyrmalar berdi.
