Úkimette jasyl tehnologııalardyń halyqaralyq ortalyǵyn qurý máselesi talqylandy
ASTANA. QazAqparat - Búgin Úkimet Úıinde QR Premer-Mınıstri Baqytjan Saǵyntaevtyń tóraǵalyǵymen QR Prezıdenti janyndaǵy «Jasyl ekonomıkaǵa» kóshý jónindegi keńes otyrysy ótti, dep habarlaıdy primeminister.kz.
Otyrys barysynda Qazaqstan Respýblıkasynyń «Jasyl ekonomıkaǵa» kóshý jónindegi 2013-2020 jyldarǵa arnalǵan tujyrymdamasynyń Іs-shara josparyn oryndaý boıynsha jumys toptarynyń esepteri tyńdaldy. QR energetıka mınıstri Q. Bozymbaev, QR ınvestıtsııalar jáne damý mınıstri J. Qasymbek jáne QR aýyl sharýashylyǵy birinshi vıtse-mınıstri Q. Aıtýǵanov baıandama jasady.
Sondaı-aq, Astanada «jasyl» tehnologııalar men ınvestıtsııalyq jobalardyń Halyqaralyq ortalyǵyn qurý boıynsha másele talqylandy. Tujyrymdamaǵa sáıkes, ortalyqtyń negizgi mindeti Qazaqstannyń «jasyl ekonomıkaǵa» tájirıbelik kóshýine járdemdesý, jańartylatyn energııa kózderi jáne ekologııalyq taza tehnologııalar sııaqty «jasyl ekonomıka» salalaryn damytýǵa qajetti turaqty negizdi qalyptastyrýǵa qoldaý kórsetý, sondaı-aq halyqaralyq yntymaqtastyqty nyǵaıtý. Atap aıtqanda, ortalyq «jasyl» tehnologııalar transferti boıynsha elderdiń ózara is-qımylyn qamtamasyz etedi.
Otyrys qorytyndysy boıynsha QR Premer-Mınıstri Baqytjan Saǵyntaev birqatar tapsyrmalar berdi.
Eske salsaq, QR Prezıdenti janyndaǵy «Jasyl ekonomıkaǵa» kóshý jónindegi keńes Memleket basshysynyń Jarlyǵymen 2014 jylǵy 26 mamyrda quryldy. Keńes tóraǵasy QR Premer-Mınıstri bolyp tabylady.
Keńes Qazaqstan Respýblıkasynyń «Jasyl ekonomıkaǵa» kóshý jónindegi tujyrymdamasyn júzege asyrýǵa monıtorıng júrgizý jáne baǵalaý, monıtorıng júrgizý jáne baǵalaý negizinde sáıkes usynymdar jasaý, «jasyl» jáne turaqty damý qaǵıdalarymen ekonomıkany jańǵyrtýdy qamtamasyz etetin Tujyrymdamany júzege asyrý strategııasyn, tásilin jáne tetikterin anyqtaý maqsatynda qurylǵan konsýltatıvtik-keńesshi organ bolyp tabylady.
