Úkimette Jańaózenniń problemaly máselelerin sheshý joldary qaraldy
ASTANA. 15 naýryz. QazAqparat - Búgin Úkimet úıinde QR Premer-Mınıstriniń birinshi orynbasary Serik Ahmetovtyń tóraǵalyǵymen Jańaózen qalasynyń problemalary máselelerin sheshýge arnalǵan jıyn ótti.
Alqaly jıyndy ashqan S. Ahmetovtyń atap ótýinshe, Jańaózenge baılanysty máselelerdi sheshý Elbasynyń tikeleı baqylaýynda. Sondaı-aq, Úkimet otyrystarynda jumys tobynyń májilisterinde qalanyń damý máseleleri júıeli túrde sheshilip keledi.
«QazMunaıGaz» barlaý-óndirý» kompanııasynyń shamamen 2 myń adamyn jumysqa ornalastyrý máselelerin sheshý úshin 2 jańa servıstik kásiporyn quryldy», - dedi S. Ahmetov.
Onyń atap ótýinshe, tártipsizdik kezinde menshikterine zaqym kelgen kásipkerlerge jeńildetilgen nesıe berý bastalǵan. Sonymen qatar jumystan shyǵarylǵandardyń jáne olardyń otbasy músheleriniń ekinshi deńgeıli bankterden alǵan nesıelerin qaıta qurylymdaý máseleleri de qarastyrylýda.
«2012-2020 jyldarǵa arnalǵan Jańaózen qalasynyń áleýmettik-ekonomıkalyq damýynyń keshendi jospary aıasynda bekitilgen barlyq is-sharalar mezgilinde júzege asyrylatyn bolady», - dedi Premer-Mınıstrdiń birinshi orynbasary.
