Úkimette ózekti máseleler qaraldy

Úkimet otyrysynda densaýlyq salasyna qatysty máseleler qaralǵan bolatyn. Densaýlyq saqtaý mınıstri Eljan Birtanov «Tsıfrlyq Qazaqstan» baǵdarlamasy aıasynda densaýlyq saqtaý júıesin aqparattandyrý men oǵan aqparattyq tehnologııalardy engizý týraly baıandady. Onyń málimeti boıynsha, qazirgi tańda onlaın-rejımde statıstıkalyq aqparatty jınaý men densaýlyq saqtaý salasyn qarjylandyrýmen qamtamasyz etýge arnalǵan 22 aqparattyq júıe jumys isteıdi. Aqparattyq júıelerdi biriktirip, derekterdiń birtutas saqtaý orny men kiretin biryńǵaı oryndy qurý úshin bıylǵy jyldyń sońynda pılottyq rejımde ınteroperabeldik platformasy iske qosylatyn bolady. Jyl sońyna deıin barlyq medıtsına uıymdary aqparattyq júıelermen qamtamasyz etiledi, ıaǵnı bul 2019 jyldyń 1 qańtarynan bastap jumystyń qaǵazsyz formatyna aýysýǵa múmkindik beredi. 2020 jylǵa qaraı halyqty densaýlyqtyń elektondy tólqujatymen qamtamasyz etý josparlanǵan. Sondaı-aq, mınıstrlik Áleýmettik medıtsınalyq saqtandyrý qorynyń aqparattyq júıesin qurý boıynsha jumystar júrgizip jatyr.

Osy rette aqparat jáne kommýnıkatsııalar mınıstri Dáýren Abaev Aýyldyq jerlerde talshyqty-optıkalyq baılanys jelilerin ornatý jobasynyń І kezeńi aıasynda 900-den astam densaýlyq saqtaý nysandaryn ınternetpen qamtamasyz etý josparlanǵanyn atap ótti. «Azamattarǵa arnalǵan Úkimet» memlekettik korporatsııasynyń front-keńselerinde jáne poshtalyq baılanys bólimshelerinde jumyspen qamtý ortalyqtarynyń ókilderi azamattarǵa mindetti medıtsınalyq saqtandyrý máseleleri boıynsha keńes beredi. «Elektrondy úkimet» portalynda, sonymen qatar qoǵamdyq qoljetimdilik pýnkteri arqyly onlaın rejımde áleýmettik statýsty anyqtaýǵa bolady.

Óńirlerde júrgizilip jatqan densaýlyq saqtaý mekemelerin aqparattandyrý jumystary týraly Ońtústik Qazaqstan, Jambyl, Shyǵys Qazaqstan oblystarynyń ákimderi baıandady.

Premer-mınıstr Baqytjan Saǵyntaev óńirler ákimderine qajetti kompıýterlik tehnıkalardy satyp alyp, medıtsına uıymdaryna aqparattyq júıelerdi engizýdi, tehnıkanyń servıstik qyzmet kórsetýi men onyń ınternetke qosylýyn retke keltirý jaǵyn baqylaýdy tapsyrdy. Osyǵan oraı, Aqparat jáne kommýnıkatsııalar, Densaýlyq saqtaý mınıstrlikterine tıisti ortalyq jáne jergilikti atqarýshy organdarmen birlesip aqparattyq júıelerdiń birlesý jumystaryn bıylǵy jyldyń 1 qarashasyna deıin aıaqtap, onyń toqtaýsyz jumys isteýin qamtamasyz etý tapsyryldy.

Kelesi áleýmettik másele - dári-dármekterdiń baǵalaryn memlekettik retteý jóninde baıandaǵan densaýlyq saqtaý mınıstri Eljan Birtanovtyń aıtýynsha, búginde dárixanalar preparattardy qandaı baǵamen satatynyn ózderi sheshedi. Osynyń saldarynan bir qalada ornalasqan dárixanalardyń baǵa aıyrmashylyǵy 20 protsentke deıin jetedi. Al naqty bir dári-dármektiń tapshylyǵy týyndasa, ústeme baǵa 200 protsentke deıin ósip ketedi. Osy rette mınıstr elimizde medıtsınalyq preparattardyń shekti baǵasyn engizý tujyrymdamasy talqyǵa salynyp, oǵan otandyq kásiporyndar da qatysatynyn, sóıtip, ortaq sheshimge kelý qajettigin aıtty.

Talqylanǵan másele boıynsha «Atameken» ulttyq kásipkerlik palatasy basqarma tóraǵasynyń orynbasary N.Áltaev sóz sóıledi.
Úkimet basshysy Baqytjan Saǵyntaev Densaýlyq saqtaý mınıstrligine «Atameken» ulttyq kásipkerlik palatasymen jáne farmatsevtıkalyq qoǵammen birge dári-dármek baǵalaryn retteý jáne qalyptastyrý tetikteri máselelerin jete pysyqtaýdy tapsyrdy.