Úkimette MJÁ aıasynda eń kóp ınvestıtsııa tartqan óńirler ataldy

ASTANA. QazAqparat - Qazaqstandaǵy ınvestorlardyń memlekettik-jekeshelik áriptestik (MJÁ) sharttaryna senimi arta tústi. Bul týraly búgingi Úkimet otyrysynda QR Ulttyq ekonomıka mınıstri Tımýr Súleımenov aıtty, dep habarlaıdy QazAqparat tilshisi.

«Investorlar tarapynan memlekettik-jekeshelik áriptestik sharttaryna senim artyp keledi.  Buǵan óz qarajatyn osy saladaǵy jobalarǵa salýǵa daıyn jeke qarjy bastamalary sanynyń ulǵaıýy kýá bolyp otyr. MJÁ jobalary boıynsha mindettemelerdiń qabyldanýyn jáne oryndalýyn monıtorıngileý úshin Qarjy mınıstrliginiń aqparattyq júıesinde tıisti modýldi iske qosý máselesi pysyqtalýda», - dedi mınıstr.

Tımýr Súleımenovtiń aıtýyna qaraǵanda, MJÁ baǵytynda jasalǵan kelisimsharttar sany boıynsha kóshbasshylar - Shyǵys Qazaqstan oblysy (71 kelisimshart ), Ońtústik Qazaqstan oblysy (22), Qaraǵandy (21) jáne Qostanaı (20) oblystary bolyp tabylady. Al tartylǵan ınvestıtsııa kólemi boıynsha Aqtóbe oblysy - 15,4 mlrd teńge, Astana qalasy - 15,1 mlrd teńge, Shyǵys Qazaqstan oblysy - 12,3 mlrd teńge, Ońtústik Qazaqstan oblysy - 10,8 mlrd teńgelik salymmen ózge óńirlerden alǵa ozǵan.

«MJÁ sharttaryn kepilmen qamtamasyz etýge qatysty aıtarym. Mınıstrlik Ulttyq bankpen jáne «Atameken» palatasymen birlesip qoldanystaǵy zańnamalyq aktilerge birqatar túzetýler ázirledi. Atalǵan túzetýler Memleket basshysynyń bes áleýmettik bastamasyn iske asyrýǵa baǵyttalǵan zań jobasyna qosylǵan jáne qazirgi ýaqytta múddeli memlekettik organdarda kelisilýde», - dedi mınıstr.