Úkimette memlekettik satyp alý júıesiniń máseleleri talqylandy

Bir jarym jyl buryn iske qosylǵan memlekettik satyp alýlardyń veb-portalynyń platformasy satyp alýlar júıesin tolyǵymen avtomattandyryp, qatysýshylardyń veb-portal arqyly onlaın rejımde elektrondy kameralyq baqylaýǵa ótýine múmkindik berdi.

Qarjy mınıstri Baqyt Sultanovtyń aıtýynsha, qabyldanǵan sharalardyń nátıjesinde bir konkýrstaǵy qatysýshylardyń ortasha sany 4 esege, únemdeý 3 esege ulǵaıǵan. Júıeni odan ári jetildirý maqsatynda, formaldy sebepter boıynsha aýytqýlarǵa jol bermeý úshin, satyp alýlarǵa qatysýshylarǵa qoıylatyn talaptar jeńildetiledi. Oń tájirıbege, salyq júktemesiniń koeffıtsıentine basa nazar aýdarylyp, aldyn ala biliktilikti irikteý ınstıtýty keńinen qoldanylatyn bolady.

Qazirde Qarjy mınıstrligi Investıtsııalar jáne damý mınıstrligimen jáne «Atameken» ulttyq kásipkerler palatasymen birlesip otandyq óndirýshilerge qoldaý kórsetý sharalaryn ázirlegen, solardyń ishinde Biryńǵaı uıymdastyrýshy arqyly satylyp alynatyn taýarlardyń, jumystardyń, qyzmet kórsetýlerdiń tizimi ulǵaıtyldy. Sonymen birge, usaq satyp alýlardy bir úlken lotqa biriktirý josparda bar.

B.Sultanov kvazımemlekettik sektordyń satyp alýlaryn zańnamalyq retteýdi qarastyratyn zań jobasy ázirlenip jatqandyǵyn aıtty. Qarjy mınıstrliginde kvazımemlekettik sektordyń barlyq sýbektilerine biryńǵaı satyp alýlar erejesin bekitý boıynsha ýákiletti organdardy anyqtaý josparlanǵan, olardyń ishinde «Samuryq-Qazyna», «Báıterek», «QazAgro» ulttyq holdıngteri bar. Ulttyq kompanııalardyń satyp alýlary úshin jeke erejeler ázirlenedi, olar memlekettik satyp alýlarǵa qaraǵanda barynsha ıkemdi bolmaq.

Memleket basshysy Joldaýyndaǵy tapsyrmalardy oryndaý maqsatynda ázirlengen zań jobasyna sáıkes Úkimetke ortalyqtandyrylǵan qyzmetter ustanymy boıynsha memlekettik satyp alýlardyń biryńǵaı júıesin engizý, kvazımemlekettik sektorda, tabıǵı monopolııa men jer qoınaýyn paıdalaný salasynda satyp alýlar júrgizý ádisterin túbegeıli qaıta qaraý júkteledi. «Zań jobasy negizgi 3 bloktan: memlekettik satyp alýlardy ortalyqtandyrýdan, kvazımemlekettik sektordaǵy satyp alýalardy retteýden, quqyq qoldaný tájirıbesiniń qorytyndysynda ázirlengen memlekettik satyp alýlardy jetildirýge baǵyttalǵan túzetýlerden turady», dedi mınıstr.

Taqyryp tóńireginde «Samuryq-Qazyna» AQ basqarma tóraǵasy Ó. Shúkeev, «Atameken» UKP basqarma tóraǵasy A.Myrzahmetov baıandama jasady.

Máseleni talqylaý qorytyndysynda Úkimet basshysy memlekettik satyp alýlar jáne kvazımemlekettik sektordyń satyp alýlary salasyn jetildirý boıynsha zańnamaǵa qatysty jumystardy ýaqytynda aıaqtaýdy tapsyrdy.

«Jalpy, aıtylǵan usynystardyń barlyǵyn qoldaımyz. Olardy talqylap, Prezıdent Ákimshiligimen kelisý úshin bir apta ýaqytymyz bar. Kelesi joly daýys beretin bolamyz jáne maýsym aıynyń sońyna deıingi belgilengen merzimde zań jobasyn Májiliske engizýge tıispiz. Júrgizilip jatqan jumystardy jalǵastyramyz», dedi Baqytjan Saǵyntaev.

Otyrysta barlyq memlekettik organ basshylaryna memlekettik satyp alý týraly zań qaǵıdalaryn qatań saqtaý, zań buzýshylyqqa jol bermeý baǵytynda naqty tapsyrmalar berildi.