Úkimette Qyzylorda oblysynyń Keshendi damý jospary tanystyryldy
NUR-SULTAN. QazAqparat - Búgin Úkimet otyrysynda Qyzylorda oblysynyń ákimi Qyrymbek Kósherbaev oblystyń 2022 jylǵa deıingi Keshendi damý josparyn tanystyrdy. Atalmysh jospar 12 baǵyt, 119 is-sharadan turady, dep habarlaıdy QazAqparat.
Strategııalyq qujat aıasynda oblystyń jol-kóliktik jáne turǵyn úı-kommýnaldyq sharýashylyǵy ınfraqurylymyn damytýǵa baǵyttalǵan sharalar usynyldy.
Aımaq basshysy oblys ortalyǵyn úzdiksiz jylýmen qamtý máselesi ózekti ekenin atap ótti.
«Qoldanystaǵy jylý qýattylyǵy (JEO) paıdalanýǵa sonaý 1964 jyldary berilgen, soǵan sáıkes jabdyqtary tozǵan. Osy sebepterge baılanysty aldaǵy ýaqytta oblys ortalyǵynyń kópqabatty 700-ge jýyq úıi jylýsyz qalýy múmkin. Sondyqtan Qyzylorda qalasynyń Jylý elektr ortalyǵy jańǵyrtýdy qajet etedi», - dedi Q.Kósherbaev Úkimet otyrysynda.
Sonymen qatar turǵyn úı-kommýnaldyq sharýashylyǵy salasyn damytý sharalarynyń arasynda oblysty gazdandyrý men kóliktik ınfraqurylymdy jetildirý bar.
«Oblysty gazdandyrý boıynsha aýqymdy jumystar júrgizilýde. Búgingi tańda aımaqtaǵy 7 aýdannyń ishinde 4 aýdan ortalyǵy kógildir otynmen qamtyldy (Aral, Qazaly, Shıeli men Jańaqorǵan). Keshendi jospardyń aıasynda qalǵan 3 aýdan ortalyǵy men 6 tirek eldimekendi gazdandyrýdy usynamyz (Sekseýil, Jaqsyqylysh, Tóretam, Aqaı, Mahambetov, Naýryz)», - dedi oblys ákimi.
Transporttyq ınfraqurylymdy damytý aıasynda 2022 jylǵa qaraı jaqsy jáne qanaǵattanarlyq jaǵdaıdaǵy avtojoldardyń sanyn 72% deıin jetkizý josparlanyp otyr. 2018 jyly bul kórsetkish 63,5% quraǵanyn atap ótken jón.
Eske salaıyq, aǵymdaǵy jyldyń aqpan aıynda Qazaqstan Respýblıkasy Qaýipsizdik Keńesiniń otyrysynda óńir turǵyndarynyń áleýmettik-ekonomıkalyq jaǵdaıyn jaqsartý jáne damý qarqynyn arttyrý maqsatynda oblystyń ózekti máseleleri qaraldy. Qaýipsizdik Keńesiniń otyrysynda Keńes Tóraǵasy-Elbasy N.Á.Nazarbaev 2022 jylǵa deıin oblysty damytýdyń Keshendi josparyn ázirleýdi tapsyrǵan bolatyn.
Óńirdi damytýdyń keshendi jospary quny 219,7 mlrd teńge bolatyn 119 is-sharadan turady. Keshendi jospar 12 baǵytty qamtıdy.Olar - ónerkásip, agroónerkásiptik keshen, kásipkerlikti damytý, kólik ınfraqurylymy, turǵyn úı kommýnaldyq sharýashylyǵy, ekologııa jáne tabıǵatty paıdalaný, halyqty áleýmettik qorǵaý, densaýlyq saqtaý, sport, sý tasqynyna qarsy is-sharalar, turǵyn úı qurylysy jáne ınjenerlik-kommýnıkatsııalyq ınfraqurylymdy damytý.
