Úkimette quramynda qanty bar sýsyndardyń aktsızin kóterý máselesi talqylanyp jatyr

NUR-SULTAN. QazAqparat – Úkimette quramynda qanty bar sýsyndarǵa aktsız engizý máselesi talqylanyp jatyr. Bul týraly QR Premer-Mınıstriniń orynbasary – Qarjy mınıstri Erulan Jamaýbaev málim etti, dep habarlaıdy QazAqparat tilshisi.

Búgin Senatta tilshiler Qarjy mınıstrinen quramynda qanty bar sýsyndarǵa aktsız engizý usynysyna qatysty suraq qoıdy.

«Quramynda qanty bar sýsyndarǵa qatysty toqtalsam, Úkimet deńgeıinde tıisti talqylaý júrip jatyr. Osy oraıda talqylaýlar qorytyndysy boıynsha tıisti málimetti jarııalap, Parlamentke kelemiz. Biz úshin tıisti teńgerimdi saqtaý kerek, ıaǵnı ult densaýlyǵy basty másele. Sonymen qatar, kásiporyndar da zardap shekpeýi kerek, bul kásippen shaǵyn jáne orta bıznes aınalysady. Sondyqtan osynyń barlyǵyn egjeı-tegjeıli pysyqtaımyz», - dedi Erulan Jamaýbaev.

Budan buryn habarlanǵandaı, temeki boıynsha kelisim ratıfıkatsııalanǵan jáne 2024 jylǵa qaraı myń dana temekige aktsız 35 evroǵa deıin artady.