Úkimette Qonaev qalasyndaǵy kazınony jabý máselesi qaralady

NUR-SULTAN. QazAqparat – Ulttyq ekonomıka mınıstri Álibek Qýantyrov Qonaev qalasyndaǵy (burynǵy Qapshaǵaı qalasy) kazınolardy jabý múmkindigine qatysty túsinik berdi, dep habarlaıdy QazAqparat tilshisi.

«Bul másele Ulttyq ekonomıka mınıstrligi deńgeıinde áli talqylanbady. Meniń oıymsha, Qonaev qalasynyń erekshe mártebesin eskere otyryp, osy taqyryp boıynsha qosymsha talqylaý bolady. Atap aıtqanda, bul baǵyttaǵy qadamdar egjeı-tegjeıli pysyqtalady», - dedi Á.Qýantyrov Ortalyq kommýnıkatsııalar qyzmetinde.

Budan buryn habarlanǵandaı, Álibek Qýantyrov jańadan qurylǵan oblystarda ınfraqurylym men joldardyń sapasyna qatysty problema bar ekenin aıtty.

Ótken aptada Berik Ábdiǵalıuly Ulytaý oblysynyń ákimi laýazymyna taǵaıyndaldy.

Sonymen qatar, Marat Sultanǵazıev Almaty oblysynyń ákimi boldy, Nurlan Uranhaev Abaı oblysynyń ákimi laýazymyna taǵaıyndaldy.

Al Jetisý oblysynyń ákimi qyzmetine Beıbit Isabaev keldi.