Úkimette qoǵamdyq tártip pen azamattardyń qaýipsizdigin qamtamasyz etý máseleleri qaraldy

ASTANA. QazAqparat - Búgin Úkimet úıinde Qazaqstan Respýblıkasynyń Premer-Mınıstri Baqytjan Saǵyntaev elimizde qoǵamdyq tártipti jáne azamattardyń qaýipsizdigin qamtamasyz etý, quqyq buzýshylyqtarǵa «nóldik tózimdilik» mádenıetin qalyptastyrý máseleleri jóninde keńes ótkizdi. Bul týraly primeminister.kz habarlaıdy.

Keńeske selektorlyq rejımde mınıstrler, óńirlerdiń ákimderi, sondaı-aq Іshki ister mınıstrliginiń jáne polıtsııanyń aýmaqtyq departamentteriniń basshylar quramy qatysty.

Іshki ister mınıstri Qalmuhanbet Qasymov elimizdegi krımınogendik jaǵdaı, urlyqtarǵa qarsy qabyldanyp jatqan is-qımyl sharalary, turmystyq zorlyq-zombylyqtyń jáne kámelet jasyna tolmaǵandar arasynda qylmystylyqtyń aldyn alý, sondaı-aq qoǵamdyq tártipti saqtaý jáne jol qaýipsizdigin qamtamasyz etý máseleleri týraly baıandady.

Prezıdenttiń Qazaqstan halqyna arnaǵan «Qazaqstandyqtardyń ál-aýqatynyń ósýi: tabys pen turmys sapasyn arttyrý» Joldaýynyń negizindegi mindetter men Qazaqstan Respýblıkasynyń 2019-2021 jj. arnalǵan ishki ister organdaryn jańǵyrtý jónindegi Jol kartasynyń is júzine asyrylýy boıynsha sharalar talqylandy.

Sonymen qatar, quqyqbuzýshylyqtardyń aldyn-alý, qylmyspen kúres jáne qoǵamdyq tártipti saqtaý boıynsha qabyldanyp jatqan sharalar, halyqqa kórsetiletin memlekettik qyzmetter sapasyn arttyrý, turǵyndardy tirkeý, ákimshilik jáne qylmystyq-protsessýaldyq qyzmetterdi tsıfrlandyrýdy engizý, jeke quram arasynda tártip pen zańdylyqty nyǵaıtý boıynsha komıssııa qyzmetiniń máseleleri jóninde óńirlerdiń ákimderi men polıtsııa departamentteriniń basshylary tyńdaldy.

Ýchaskelik polıtsııa ınspektorlarynyń rólin arttyrýǵa, turǵyn úımen japsarlas ýchaskelik polıtsııa pýnktterin salýǵa, mektep ınspektorlarynyń ınstıtýtyn odan ári damytýǵa erekshe kóńil bólindi.