Úkimette Qazaqstannyń ruqsat berý júıesiniń birqatar júıelik problemalaryn sheshýge baǵyttalǵan zań jobasy qarastyrylýda
ASTANA. QazAqparat - Búgin Úkimet otyrysynda «Ruqsattar men habarlamalar týraly» jáne «Qazaqstan Respýblıkasynyń keıbir zańnamalyq aktilerine ruqsat berý júıesi máseleler boıynsha ózgerister men tolyqtyrýlar engizý týraly» QR Zań jobalary qarastyrylýda.
Atalǵan qujatty tanystyrǵan QR Óńirlik damý mınıstri Bolat Jámishevtiń aıtýynsha, negizgi zań úsh bólimnen turady. Oǵan «Lıtsenzııalaý týraly» zań tolyǵymen engen. Zań jobasynyń bul bólim osy saladaǵy búgingi problemalar eskerile otyryp pysyqtaldy. Sondaı-aq zań jobasyna «Ákimshilik rásimder týraly» QR Zańynan habarlamalar týraly erejeler tolyǵymen engizildi. Zań jobasynyń úshinshi bólimi tolyǵymen jańadan jazylǵan jáne lıtsenzııa bolyp tabylmaıtyn ruqsat rásimderiniń máselelerin reglamentteıdi.
«Zań jobasynyń qosymshasyna 742 qujat endi. Onyń ishinde 709 ruqsat jáne 33 habarlama bar. Jalpy alǵanda, zań jobasy Qazaqstannyń ruqsat berý júıesiniń birqatar júıelik problemalaryn sheshýge baǵyttalǵan. Atap aıtqanda, ruqsattar sanynyń únemi artýyn, jańa ruqsattardyń negizsiz engiziletinin, ruqsat berý júıesinde táýekelderdi baǵalaýdyń qoldanylmaýyn, ruqsattardyń tártipke keltirilmeýin qamtıdy», - dedi mınıstr.
B.Jámishevtiń atap ótýinshe, osyǵan oraı zań jobasy olardy sheshýdiń birqatar joldaryn, naqty aıtqanda, zańdaǵy ruqsattardyń tolyq tizbesin, jańa ruqsattardy engizýde retteýish áserin taldaýdyń qoldanylýyn, ruqsattardy qaýiptilik dárejesi boıynsha sanattaýdy qarastyrady.
