Úkimette Qazaqstannyń EYDU-men yntymaqtastyǵynyń máseleleri talqylandy

NUR-SULTAN. QazAqparat - Qazaqstan men EYDU arasyndaǵy ózara tıimdi yntymaqtastyqty nyǵaıtý mańyzdy. Úkimette QR Premer-Mınıstriniń birinshi orynbasary Álıhan Smaıylov pen EYDU-nyń jahandyq qatynastar jónindegi hatshylyǵynyń Eýrazııa bóliminiń basshysy Ýılıam Tompson kezdesý barysynda osy máseleni talqylady.

Ulttyq damý jospary el saıasatyn EYDU standarttaryna jetkizýdi jáne 2025 jyly Uıymǵa múshelikke ótýge ótinish daıyndaýdy qarastyrady, dep habarlaıdy QazAqparat Úkimettiń resmı saıtyna silteme jasap.

Premer-Mınıstrdiń orynbasary Á. Smaıylov uzaq merzimdi seriktestikke jańa serpin berý úshin yntymaqtastyqtyń jańa formaty retinde Action Plan ázirlenip jatqanyn, onda ózara árekettesýdiń naqty baǵyttary bolatynyn atap ótti.

«Biz Qazaqstanda EYDU standarttaryn damytý úshin uıymmen tyǵyz baılanysty jalǵastyrýymyz kerek. Biz ulttyq statıstıka men sybaılas jemqorlyqpen kúres salasyndaǵy yntymaqtastyqtyń oń tustaryn kórip otyrmyz. Sonymen qatar bıznes ortany damytý, ınvestıtsııalar tartý, tıimdi memlekettik basqarý, zańdylyqty qamtamasyz etý sııaqty baǵyttardy qamtý qajettiligi joǵary», — dedi Á. Smaıylov.

Esterińizge sala keteıik, Qazaqstan EYDU-nyń birqatar aımaqtyq bastamalarynyń belsendi qatysýshysy. Atap aıtqanda, Shyǵys Eýropa men Ortalyq Azııa úshin sybaılas jemqorlyqqa qarsy jeli, Shyǵys Eýropa, Kavkaz jáne Ortalyq Azııa úshin ekologııalyq is-qımyl baǵdarlamasyn iske asyrý jónindegi arnaıy jumys toby jáne tabıǵı resýrstardy paıdalanýǵa negizdelgen damý máseleleri boıynsha saıası dıalog tárizdi jobalardy qoldaýda.