Úkimette Qazaqstan azamattarynyń tabysyn arttyrý máseleleri qaraldy
ASTANA. QazAqparat - Búgin Úkimet úıinde QR Premer-Mınıstriniń orynbasary Erbolat Dosaevtyń tóraǵalyǵymen elimizdiń azamattarynyń tabysyn arttyrý men turmys sapasyn jaqsartý, sondaı-aq kóp balaly otbasylardy qoldaý sharalaryn kúsheıtý jónindegi jumys tobynyń kezekti otyrysy ótti, dep habarlaıdy primeminister.kz.
Jumys keńesi aıasynda halyqtyń álsiz toptaryn, ásirese kóp balaly otbasylardy qoldaýdyń qosymsha tetikterin ázirleý jáne áleýmettik ál-aýqatyn qamtamasyz etý boıynsha qabyldanyp jatqan sharalardyń tıimdiligin arttyrý máseleleri talqylandy. Elimizdiń óńirlerinde kóp balaly otbasylarmen kezdesýler jáne aýlalardy aralaý barysynda jurtshylyqtan túsken naqty usynystar qaraldy.
E. Dosaev qazaqstandyqtardyń ál-aýqatyn arttyrý men turmys sapasyn jaqsartý - Úkimet jumysynyń QR Prezıdenti N. Nazarbaev 2018 jylǵy 5 qazandaǵy Joldaýynda atap kórsetken basty basymdyǵy ekenin atap ótti. Osyǵan oraı, azamattardyń tabysynyń ósýin qamtamasyz etý jáne turmys sapasyn arttyrý jónindegi mindetter ortalyq jáne jergilikti atqarýshy organdardyń negizgi mindetteriniń biri.
Jumystyń negizgi baǵyttary retinde mynalar anyqtaldy:
bıýrokratııalyq rásimderdi ońaılatý arqyly ataýly áleýmettik kómek alýdy jeńildetý;
memlekettiń qoldaýyna muqtaj kóp balaly otbasylarǵa járdemaqy tóleý tetigin jetildirý;
jergilikti atqarýshy organdar jekeleı kóp balaly otbasydan shyqqan balalardy bastaýysh synypta tegin ystyq tamaqpen, qoǵamdyq kólikte jol júrý bıletimen qamtýdy jáne t.b. keńeıtý máselesin qarastyrady;
asa muqtaj kóp balaly otbasylardyń turǵyn úı jaǵdaıyn jaqsartý turǵysynan mýnıtsıpaldy arendalyq turǵyn úıge qoljetimdilikti arttyrý múmkindigi jekeleı qarastyrylady.
Keńeske «Nur Otan» partııasynyń ókilderi, QR Parlamenti Májilisiniń depýtattary, áleýmettik-ekonomıkalyq blok, ınfraqurylymdyq damý, ishki ister mınıstrlikteriniń, sondaı-aq selektor rejıminde - jergilikti atqarýshy organdardyń basshylary qatysty. Budan ózge, búgingi otyrysqa saraptamalyq qaýymdastyq pen ÚEU ókilderi qatysty.
Eńbek jáne halyqty áleýmettik qorǵaý mınıstri M. Ábilqasymova elimizdiń barlyq óńirinde operatıvtik shtabtar qurylǵanyn aıtty. Halyqpen jáne bastamashy toptarmen kezdesýler ótkizilýde, sonymen qatar balaly otbasylardyń turǵyn úı-turmys jaǵdaıyn tekserý maqsatynda aýlalardy aralaý jumystary júrgizilip jatyr. Búginde jergilikti jerlerde usynylatyn túrli áleýmettik qyzmetter, densaýlyq saqtaý qyzmetteri, bilim berý, turǵyn úı jaǵdaılary, áleýmettik qorǵaý salalaryna qatysty 1500-den astam usynys jınaqtalǵan. Azamattar ákimdikterge júginý arqyly qosymsha usynystaryn jetkize alady.
Indýstrııa jáne ınfraqurylymdyq damý mınıstri J. Qasymbek azamattardyń turǵyn úı jaǵdaılaryn jaqsartý máseleleri týraly baıandady. Máselen, halyqtyń áleýmettik osal toptaryna turǵyn úıdiń qoljetimdiligin arttyrý boıynsha qosymsha naqty tetiter ázirlenip jatyr. Bilim jáne ǵylym mınıstri E. Saǵadıev jańa mektepter salý, bastaýysh synyptardyń oqýshylaryn tegin tamaqpen qamtý úlesin keńeıtý, sondaı-aq aýyldyq eldi mekenderde bilim berýdiń qoljetimdiligin arttyrý maqsatynda atqarylyp jatqan jumystar týraly baıandady. Densaýlyq saqtaý mınıstri E. Birtanov medıtsınalyq qyzmetterdiń sapasyn jaqsartý, olardyń qoljetimdiligin arttyrý jáne balalardy densaýlyq saqtaý júıesimen qamtý boıynsha oryndalyp jatqan jumystar týraly málimdedi. Úlesteý tetigi kóp balaly otbasylardyń múshelerine, halyqtyń áleýmettik álsiz toptaryna qymbat turatyn protsedýralardy, dári-dármek túrlerin, stomatologııalyq qyzmetterdi jáne t.b. alýyna múmkindik beretini atalyp ótti. Óz kezeginde, qarjy mınıstri Á. Smaıylov bıýdjettiń áleýmettik baǵyttylyǵy týraly baıandady. Respýblıkalyq bıýdjetten 2019 jylǵa áleýmettik salaǵa 4,8 trln teńge baǵyttalady, bul bıýdjettiń barlyq shyǵyndarynyń 45% quraıdy. Sonymen qatar, áleýmettik sala shyǵystarynyń úlesin odan ári arttyrý jumystary jalǵaspaq.
Jumys tobynyń kelesi otyrysy 21 aqpanda ótkizilmek.
