Úkimette elimizdiń MÁMS engizýge ázirligi qaraldy
QR densaýlyq saqtaý mınıstri E. Birtanov, Qaraǵandy oblysynyń ákimi J. Qasymbek, «Mindetti áleýmettik medıtsınalyq saqtandyrý qory» KEAQ basqarma tóraǵasy A. Jumaǵulov baıandama jasady.
Osy jyldyń 1 qyrkúıeginen bastap Qaraǵandy oblysynda pılottyq joba iske asyrylýda, ol MÁMS júıesin aprobatsııalaýǵa jáne ony Qazaqstanda tolyq kólemde engizýge daıyndalýǵa múmkindik berdi. Óńirde eki aıda turǵyndardy medıtsınalyq saqtandyrý (192%-ǵa) esebinen ońaltý kómegi (42,2%-ǵa) jáne qymbat zertteýlermen (KT jáne MRT) qamtý kólemi artty.
Tegin medıtsınalyq kómektiń kepildik berilgen kóleminiń (TMKKK) jańa modeli jáne MÁMS paketi 2020 jyldyń 1 qańtarynan bastap úsh deńgeıli medıtsınalyq qamsyzdandyrý júıesin engizýdi qarastyrady.
Birinshi deńgeı — TMKKK jańa modeli memleket mindettemeleriniń naqty shekterin anyqtaıdy jáne halyqty bazalyq medıtsınalyq qyzmettermen jalpylama qamtý boıynsha jalpyǵa birdeı tanylǵan halyqaralyq standartty júzege asyrady.
Ekinshi deńgeı — saqtandyrylǵan turǵyndarǵa arnalǵan MÁMS paketi, bul TMKKK tys medıtsınalyq kómektiń qoljetimdiligin qamtamasyz etedi.
Úshinshi deńgeı — bul TMKKK jáne MÁMS paketterine kirmeıtin medıtsınalyq qyzmetter. Olar aqyly túrde nemese erikti medıtsınalyq saqtandyrý esebinen qamtamasyz etiledi.
Memleket halyqty alǵashqy medıtsınalyq-sanıtarlyq kómek deńgeıinde bazalyq medıtsınalyq qyzmetterdiń qajetti paketimen (profılaktıkalyq egýler men medıtsınalyq tekserýler, patronaj, júktilik kezinde qaraý jáne t.b.) jáne jedel jáne shuǵyl kómekke qoljetimdilikpen qamtamasyz etýdi jalǵastyrýda.
MÁMS engizýdi eskere otyryp, jalpy alǵanda 2020 jyly densaýlyq saqtaý salasyna arnalǵan bıýdjet elimiz boıynsha shamamen 1,5 trln teńgeni quraıdy, onyń ishinde MÁMS esebinen 500 mlrd teńgeden astam qarajat. Medıtsınalyq ońaltýdy qosa alǵanda, halyqtyń qajettilikterine negizdelgen medıtsınalyq kómektiń basym túrlerin qarjylandyrý edáýir artady, ol kelesi jyly 7 esege jáne 2025 jylǵa qaraı 11 esege deıin ulǵaıady. Kelesi jyly medıtsına qyzmetkerleriniń jalaqysy dárigerlerge 30%-ǵa jáne orta medıtsına qyzmetkerine 20%-ǵa, al 2025 jylǵa qaraı olar qazirgi jalaqymen salystyrǵanda 2 ese ósedi.
«Elbasy N. Nazarbaev mindetti áleýmettik medıtsınalyq saqtandyrýǵa kóshýge tolyq daıyndyqty qamtamasyz etý mindetin qoıdy. Memleket basshysy Q. Toqaev óz Joldaýynda áleýmettik medıtsınalyq saqtandyrýdy iske asyrý máselesine úlken jaýapkershilikpen qaraý qajettigin eskertti. Onymen barlyq qazaqstandyq qamtylýy tıis. Ol úshin barlyq deńgeıdegi medıtsınalyq mekemeler qajetti aqparattyq júıelerge qosylýy kerek. Árbir azamattyń derekteri jańartylýy tıis», — dedi A. Mamın.
Premer-Mınıstr MÁMS engizý boıynsha pılottyq jobanyń nátıjesin oń baǵalap, Qaraǵandy oblysynyń bul tájirıbesin basqa óńirler de eskerýi qajet ekenin aıtty.
Úkimet basshysy osy jyldyń sońyna deıin medıtsınalyq uıymdardyń MÁMS iske qosýǵa tolyq daıyndyǵyn qamtamasyz etýdi, turǵyndar týraly derekterdiń tolyq jańartylýyn aıaqtaýdy jáne balalar, stýdentter men úsh jasqa deıingi balalardy tárbıelep otyrǵan, jumyssyz azamattar boıynsha aqparattyq júıelerdegi derekterdiń dáldigin qamtamasyz etýdi tapsyrdy.
