Úkimette Daǵdarysqa qarsy sharalar jónindegi jedel shtabtyń kezekti otyrysy ótti

NUR-SULTAN. QazAqparat – QR Premer-Mınıstri Daǵdarysqa qarsy sharalar jónindegi jedel shtabtyń kezekti otyrysyn ótkizdi, dep habarlaıdy QazAqparat Úkimettiń resmı saıtyna silteme jasap.

Otyrysta Transkaspıı halyqaralyq kólik baǵdaryn (THKB) damytý boıynsha ótkizilgen kelissózderdiń nátıjeleri jáne qazaqstandyq júkterdi tasymaldaý máseleleri qaraldy.

Qazaqstandyq jáne tranzıttik júkterdi tasymaldaýdy qamtamasyz etý úshin 9-10 naýryzda QR Indýstrııa jáne ınfraqurylymdyq damý mınıstrliginiń, Ázerbaıjannyń Tsıfrlyq damý jáne kólik mınıstrliginiń, Grýzııanyń Ekonomıka jáne turaqty damý mınıstrliginiń ókilderi arasynda kelissózder júrgizildi.

THKB damytý maqsatynda taraptar ótpeli tarıf belgileý, júkterdi deklaratsııalaý, biryńǵaı AT-sheshimderdi qoldaný jáne tranzıttik júkterdi shoǵyrlandyrý máselelerin sheshetin birlesken kásiporyn qurý týraly kelisti.

Jalpy, baǵyt boıynsha jylyna 10 mln tonnaǵa deıin, onyń ishinde 200 myń konteınerge deıin tasymaldaý múmkindigi bar. Lıanıýngan (QHR) porty arqyly qoldanystaǵy marshrýtqa qatysty tranzıttik júk tasymaldaryna tarıfti tómendetý máselesi pysyqtalyp jatyr.
«Atameken» UKP tóralqa tóraǵasy R. Batalovtyń aıtýynsha, memlekettik organdar men bıznestiń birlesip atqarǵan jumysynyń nátıjesinde qazirgi tańda QHR shekarasynda qazaqstandyq júkterdiń turyp qalý jaǵdaılary baıqalmaıdy.

Belarýs shekarasynda júkterdiń turyp qalýyna qatysty bıznesten buǵan deıin túsken aqparatqa sáıkes tıisti monıtorıng júrgizildi, onyń qorytyndysy boıynsha atalǵan málimet rastalǵan joq. Jedel shtabtyń kelesi otyrysy 11 naýryzda ótedi.