Úkimette «Beldeý jáne Jol» bastamasy máseleleri talqylandy

ASTANA. QazAqparat - Búgin Úkimet úıinde QR Premer-Mınıstri Baqytjan Saǵyntaev QHR Ortalyq komıtetiniń 18-QKP múshesiniń orynbasary, QHR bas salyq ákimshiliginiń mınıstri Van Tszıýn myrzamen kezdesý ótkizdi. Bul týraly QazAqparat primeminister.kz silteme jasap habarlaıdy.

Kezdesý barysynda «Beldeý jáne Jol» bastamasy aıasynda eki eldiń salyq organdary arasyndaǵy ózara is-qımyldyń tıimdi tetigin qurý, sondaı-aq, salyq saıasaty salasynda QHR-men yntymaqtastyq máseleleri talqylandy.

Anyqtama: Qazaqstan men Qytaı arasyndaǵy salyq qatynastary 2001 jyldan, Astana qalasynda Qazaqstan Respýblıkasynyń Úkimeti men Qytaı Halyq Respýblıkasynyń Úkimeti arasyndaǵy qosarlanǵan salyq salýdy boldyrmaý jáne tabys salyǵyna qatysty salyq salýdan jaltarýǵa jol bermeý týraly kelisimge qol qoıylǵan kezden (2001 jylǵy 12 qyrkúıek) bastaý alady.

2017 jylǵy maýsymda QHR Tóraǵasy Sı Tszınpınniń sapary aıasynda QR Qarjy mınıstrligi men QHR Memlekettik salyq ákimshiligi arasynda salyq salý máseleleri boıynsha ózara túsinistik pen yntymaqtastyq týraly memorandýmǵa qol qoıyldy.