Úkimette «Báıterek» holdıngin damytý jospary qaraldy
ASTANA. QazAqparat - Búgin Úkimet úıinde QR Premer-Mınıstri Baqytjan Saǵyntaevtyń tóraǵalyǵymen «Báıterek» ulttyq basqarýshy holdıngi» AQ Dırektorlar keńesiniń kezekti otyrysy ótti. Bul týraly primeminister.kz saıtynda habarlandy.
Otyrys barysynda «Saryarqa» magıstraldi gaz qubyrynyń qurylysy, «Nurly jer» memlekettik baǵdarlamasyn iske asyrý, «Turǵyn úı qatynastary týraly» zań aıasynda «Áskerı ıpoteka» ónimin engizý, «KazakhExport» ESK qyzmetin jandandyrý jáne taǵy da basqa máselelerdi eskere otyryp, «Báıterek» UBH damytýdyń 2017-2021 jyldarǵa arnalǵan jospary qaraldy.
Dırektorlar keńesi «Báıterek» UBH ınvestıtsııalyq saıasatynyń jańa redaktsııasyn bekitti. Oǵan sáıkes, holdıngtiń jáne enshiles uıymdardyń ınvestıtsııalyq qyzmeti, onyń ishinde memlekettik damý baǵdarlamalaryna sáıkes, joǵary áleýmettik-ekonomıkalyq mańyzy bar jobalarǵa arnalǵan qoldaý sharalaryna basymdyq berýge baǵyttalǵan.
Sonymen qatar, kezdesý qatysýshylary «Básekege qabilettilik kóshbasshylary - Ulttyq chempıondar 2.0» baǵdarlamasynyń tujyrymdamasyn qarap, «Báıterek» UBH» AQ tórtinshi oblıgatsııalyq baǵdarlamasy aıasynda oblıgatsııalardyń úshinshi shyǵarylymynyń sharttaryn anyqtady.
