Úkimette baǵany turaqtandyrý jáne áleýmettik seriktestik máseleleri talqylandy
ASTANA. 7 mamyr. QazAqparat - Búgin Úkimet úıinde Premer-Mınıstrdiń orynbasary Erbol Orynbaevtyń tóraǵalyǵymen Áleýmettik seriktestik pen áleýmettik jáne eńbek qatynastaryn retteý jónindegi respýblıkalyq úshjaqty komıssııanyń otyrysy ótti, dep habarlaıdy www.pm.kz saıtynan.
Otyrysta azyq-túliktiń, taýarlar men qyzmet kórsetýlerdiń baǵalaryn turaqtandyrý máselelerine qatysty Kásipodaqtar federatsııasynyń málimdemesi qaraldy.
Ekonomıkalyq damý jáne saýda mınıstrliginiń, Tabıǵı monopolııalardy retteý agenttiginiń, Básekelestikti qorǵaý agenttiginiń, Statıstıka agenttiginiń jáne Ulttyq banktiń ókilderi baıandamalar jasady.
Ekonomıkalyq damý jáne saýda vıtse-mınıstri Mádına Ábilqasymovanyń habarlaýynsha, 2011 jyldyń naýryzy men 2012 jyldyń naýryzy aralyǵynda jyldyq ınflıatsııa 4,6 paıyzdy qurady. Osy aralyqta azyq-túlik taýarlarynyń baǵasy 4,6 paıyzǵa, qyzmet kórsetýlerdiń baǵasy - 4,1 paıyzǵa ósti. Toqash jáne unnan jasalǵan ónimderdiń baǵasy 6,1 paıyzǵa, sút ónimderiniń baǵasy 5,5 paıyzǵa, kofe, shaı, kakao 5 paıyzǵa, makaron ónimderi- 2,7 paıyzǵa ósti.
Esesine, qant baǵasy 17,5 paıyzǵa, kókónis pen jemis 16,2 paıyzǵa, jarma ónimderiniń baǵasy - 8,2 paıyzǵa, un 4,9 paıyzǵa arzandady.
Qazirgi tańda Ekonomıkalyq damý jáne saýda mınıstrligi azyq-túlik taýarlarynyń baǵasyn turaqtandyrý jónindegi birqatar sharalar qabyldaýda. Atap aıtqanda, Elbasynyń tapsyrmasyna sáıkes, Mınıstrlik oblystardyń, Astana men Almaty qalalarynyń ákimderimen birlese otyryp, aýyl sharýashylyǵy ónimderin ótkizýdegi araǵaıyndardy joıýdyń yqtımal tetikterin zerdeleýde.
Ekonomıkalyq damý jáne saýda mınıstrliginiń aqparaty boıynsha, ınflıatsııanyń kóterilýine álemdik taýarly naryqtardaǵy baǵalardyń ósýi negizgi faktor bolyp otyr. Dúnıejúzilik banktiń deregi boıynsha, ótken jyldyń naýryzy men aǵymdaǵy jyldyń naýryzy aralyǵynda energııa resýrstary men aýyl sharýashylyǵy ónimderine degen álemdik baǵalar ósken.
«Úkimet halyqtyń turmys deńgeıin qoldaý úshin jáne áleýmettik-mańyzdy azyq-túlik taýarlary baǵalarynyń negizsiz ósýine jol bermes úshin birqatar júıeli sharalar qabyldaýda», - dep habarlady vıtse-mınıstr óz sózinde. Atap aıtqanda, QR Úkimetiniń 2012 jylǵy 13 qańtardaǵy Qaýlysymen áleýmettik-mańyzdy azyq-túlik taýarlarynyń 2012 jylǵa arnalǵan bólshek saýda baǵalarynyń shekti mánderi bekitildi.
Talqylaýdyń qorytyndysy boıynsha E.Orynbaev Ekonomıkalyq damý jáne saýda mınıstrligine turmysy tómen otbasylardy qoljetimdi azyq-túlik taýarlarymen qamtamasyz etýdi qoldaýdyń tetikterin ázirleý týraly; Básekelestikti qorǵaý agenttigine keıbir azyq-túlik baǵalarynyń kúrt ósý faktileri boıynsha tekserý júrgizý týraly tapsyrma berdi.
Otyrysta sondaı-aq munaı-gaz salasyndaǵy áleýmettik-seriktestik pen áleýmettik dıalog máseleleri talqylandy jáne Mańǵystaý oblysy boıynsha áleýmettik seriktestik pen áleýmettik jáne eńbek qatynastaryn retteý jónindegi óńirlik komıssııanyń jumys qorytyndysy qaraldy.
