Úkimette azyq-túlik baǵasy, halyqty jumysqa ornalastyrý máseleleri qaraldy

ASTANA. QazAqparat – Áleýmettik mańyzy bar azyq-túlik baǵasynyń eń joǵary ósimi Ulytaý, Mańǵystaý jáne Batys Qazaqstan oblystarynda tirkeldi. Bul týraly búgin QR Premer-Mınıstri Álıhan Smaıylov áleýmettik mańyzy bar azyq-túlik taýarlary (ÁMAT) baǵalary jáne jańa jumys oryndaryn qurý máseleleri boıynsha keńeste aıtyldy. QazAqparat bul týraly Úkimet basshysynyń baspasóz qyzmetine silteme jasap habarlaıdy.

Jyl basynan beri ÁMAT baǵasy 19,6%, onyń ishinde ótken aptada 0,1% kóterilgen. Óńirler boıynsha eń joǵary ósim Ulytaý, Mańǵystaý jáne Batys Qazaqstan oblystarynda tirkeldi. Alaıda sońǵy ýaqytta elimizde birqatar taýar pozıtsııasynyń, sonyń ishinde pııaz ben qant baǵasy tómendep keledi.

Baǵany turaqtandyrý úshin 186,1 myń tonnaǵa jýyq ÁMAT qory bar. Sonymen qatar óńirlerde kókónisterdi jınaý jumystary jalǵasyp jatyr, bul turaqtandyrý qorlarynyń azyq-túlik bazasyn odan ári ulǵaıtýǵa múmkindik beredi.

Premer-Mınıstr qazirgi ýaqytta bıylǵy eginnen jınalǵan kókónis ónimderiniń baǵasy tómen ekenin atap ótti. Osyǵan baılanysty óńirlerdiń ákimderi turaqtandyrý qorlaryn belsendi túrde tolyqtyrýy qajet.

«Naýryz aıynan maýsym aıyna deıin jalǵasatyn maýsymaralyq kezeńde tapshylyqty boldyrmaý jáne qymbat kókónisterdi syrttan tasymaý úshin qoımalardy qazirden bastap pııaz, kartop, sábiz, qyryqqabatpen toltyrý qajet. Maýsymdyq kezeńde baǵany ınterventsııalaý jáne kókónis baǵasynyń sharyqtap ketýine jol bermeý úshin olardy eń tómen baǵamen satyp alatyn múmkindikti qazirden tıimdi paıdalaný qajet», — dedi dedi Álıhan Smaıylov.

Eńbek naryǵynyń barlyq negizgi kórsetkishi búgingi tańda turaqty. Bul rette memleket sýbsıdııalaıtyn jumys oryndaryn qosqanda, jańa turaqty jumys oryndaryn ashý, bos pozıtsııalardy jabý, eńbek resýrstarynyń utqyrlyǵyn arttyrý jáne ózge de sharalardy iske asyrý jalǵasyp jatyr.

«Memleket basshysy barlyq aýdandar men qalalardyń ákimderine jyl saıyn árbir 10 myń turǵynǵa keminde 100 jumys ornyn qurýdy tapsyrdy. Alaıda qazir Soltústik Qazaqstan, Pavlodar, Aqmola jáne Qostanaı oblystarynda jumys tıimsiz júrgizilip jatyr», — dedi Álıhan Smaıylov.

Onyń aıtýynsha, birqatar oblysta mindetti zeınetaqy jarnalary boıynsha kórsetkishter tómen jáne jalǵan jumysqa ornalasý faktileri anyqtalyp jatyr.

Foto: primeminister.kz